Казанда дөньяның боксчылары үзләрен көчлерәк хис итә икән

— Республикада 8 мең кеше спортның бокс төре белән шөгыльләнә. Керү ирекле, бокс бәйрәменә рәхим итегез! - диде Татарстанның спорт министры урынбасары Хәлил Шәйхетдинов.

 Турнирда Казахстан, Үзбәкстан, Намибия, Малави, Танзания, Россия спортчылары катнаша. Алексей Олейник белән Таһир Дзоблаев (Россия), Асламбек Идигов белән Мешак Мванкем (Танзания), Апти Давтаев (Россия) белән Ажибу Мус (Малави), Сергей Акопян белән Даниил Серегин (Россия) очраша. Татарстан боксчылары да күрсәтмә чыгышлар ясый. Тимур Мамышев (Казан), Али Галиев (Арча), Павел Сидоров (Түбән Кама), Илназ Маталиев (Түбән Кама), Степан Назаров (Әлмәт), Илфар Галиев (Түбән Кама), Гөлүсә Галиева (Арча), Анна Платонова (Пенза) рингка чыга.

— Казан - Россиянең, ә бәлки, бөтен дөньяның асыл мәрҗәне. Казанда турнирлар үткәрү җиңел, спортчылар үзләрен яхшы хис итә. Татарстанның спорт чаралары оештыру тәҗрибәсе зур, - диде бокс буенча дөнья чемпионы Руслан Чагаев.

Боксчылар Алексей Олейник, Таһир Дзоблаев, чараны оештыручы Сергей Завилейский да Казанда спорт чараларының халыкара дәрәҗәдә булуын әйттеләр.

Турнир Матч-боец каналында тулысынча, ә Матч-ТВ каналында 2 төп очрашу күрсәтелә.