Муса Галләмов мотиваторлары турында: «Әнә, әле дә юыну бүлмәсендә калдылар»

Ярый әле Теләче районы, аннан Лаеш үзенә чакырды дип уйлыйм үземчә. Үзләрендә барыбер бүгенге Муса кичергән үсеш була алмас иде дип саныйм. Көндәшләр дә кирәк, тренерлар да, мотиваторлар да дигәндәй.

Моннан берничә ел элек Муса Галләмов турында «көрәштән китергә җыена ахры, пора ахры», дип язган идем. Үпкәләмәде, әмма барыбер бу хакта искә төшерде үзе бер. Аяклары белән азапланган чагы, призерлар исемлегенә дә керми башлаган иде. Соңгы араларда, тьфу-тьфу, «икенче сулышы» ачылды кебек Мусаның. Призерлар арасына кайтты гына түгел, беренче урыннар өчен дә көрәшә башлады. Ябыгып та киткән шикелле. Әлеге дә баягы, мотиваторлары да барлыкка килгән икән. Әнә, фотода да шулар белән. Бу батырларны көрәш җәмәгатьчелеге белә, таный: данлыклы Яңа Арыш батыры Вәлит Ишмөхәммәтов белән Олы Елга батыры Фәнис Галиуллиннар. Икесе дә Балык Бистәсе районы егетләре. «Хәлләрем турында сөйләшеп утырганда, Вәлит абыйга спаринг-партнерлар җитешми дигән идем. Дусты Фәнис абыйны ияртеп, Лаешка тренировкаларга йөри башладылар. Үзләре йөриләр Лаешка. Үзләре дә шөгыльләнәләр, көрәшүләре шәп әле. Фәнис абый күпне күргән, авыр үлчәүләрдә дә көрәшкән, болай итеп кара әле, болай эшлә әле дип кенә тора. Серләре белән уртаклашалар, морально да көч биреп торалар. Чыннан да, икенче сулыш ачылды кебек. Рәхмәт аларга. Әнә, тренировкадан соң әле дә юыну бүлмәсендә калдылар», ди Муса.

Хәл-әхвәлләрен дә сорашып алдым. Гаилә нисбәтеннән дә Муса уникум бит әле: дүрт кыз әтисе! Зур кызы 8 класска барса, кечкенәсенә 3 тулган әнә. Лаешта яшәп яталар матур гына.

Көрәш кагыйдәләре турында да сорашып алдым. «Көрәшергә була. Ләкин авыррак. Аякны күчерүләргә кисәтү бирү бәлки артыграктыр. Мин көрәшкәндә генә дә 100 тапкыр үзгәрттеләр инде кагыйдәләрне, ияләшәбез инде, нишлисең», ди Муса елмаеп.

Әлегә Сабантуйларга әзерләнә башлаганнар. «Данил Галиев турнирыннан кайттык та (Муса беренче булды – Р.С.), артык ял итеп тормадык, залга киттек. Кайда мөмкинлек була, шунда көрәшергә җыенам инде, Аллаһы боерса», дип сүзен төгәлләде Муса.

Көрәштән китәргә иртәрәк әле, Муса. Иң мөһиме, сау-сәламәт бул! Теге чактагы сүзләремне кире алам:)