Нәфис Миннебаев көрәшкә кайта: Данил Галиев турнирына әзерләнә

Татарстанның танылган көрәшчесе, Универсиада чемпионы Нәфис Миннебаевның көрәштән бераз иртәрәк китүе турында күп сөйләнде. Заманында ул шактый озак вакыт Биектау районында спорткомитет җитәкчесе булып эшләде. Күнегүләргә йөри алмавын, көрәштән “суынуын” да шуның белән, эш күплелеге белән бәйләде. Ул чакта Нәфис хәзерге Татарстанның көрәш федерациясе җитәкчесе Рөстәм Кәлимуллин район башлыгы булып эшләгән чорда хезмәт итте. Күптән түгел генә Рөстәм Галиуллович аңа “давай, көрәш әле син, Нәфис. Яшьләргә үрнәк күрсәтергә кирәк” дигән тәкъдим белән чыккан. Нәфис ризалашкан. Алай гына да түгел, үзен көрәш дөньясына танытуга зур өлеш керткән данлыклы тренер Илдар Хәбибуллинга мөрәҗәгать белән чыккан: “Хамматыч, көрәшәсе килә!”.

Билгеле булганча, Илдар абый тренерлык эшеннән китүе турында игълан иткән иде инде. Ләкин Миннебаев тәкъдименә каршы тора алмаган, ризалашкан. Энергоуниверситет көрәш залында көнгә икешәр тапкыр атнасына өч көн тренировкаларны башлап җибәргәннәр. Эшне, гадәттәгечә, вес куудан башлаганнар. Хәер, моның өчен артык зур тырышлык соралмаган. 60 кг.да чыгыш ясаган Нәфис тренировкаларга керешкәнче дә 65 килога гына җиткән. “Иң авыры сөлге тотып келәмгә чыгу булды. Манекен гына булса да, тормышымдагы иң җитди көндәшем кебек кабул иттем мин аны. Берничә ел көрәшми торгач, шулай була икән. Беренче тотуда ук чистага салдым үзен. Хамматыч булды бу, чемпион булырлыгың бар икән диде дә, тотынды куарга. 60 килога төштем, ураза да булышты. Данил Галиев турнирында келәмгә чыгарга җыенам. Шунысы сөендерә, Илдар абый янына үзебезнең энергоуниверситет егетләре дә килә башлады: Зөлфәт Хәсәнов, Илфат Хәбибуллин, Фәһим Ибәтуллин, Айрат Нуриев, Ранис Галимуллин, Илгиз Әхмәтгалиев, Айнур Нәҗмиев... Әллә команда буларак оешыйкмы икән дип уйлап торабыз әле, нәрсә булып чыгар”, ди Нәфис.

Рәсми ярышларда Нәфис Миннебаев соңгы тапкыр нәкъ менә Биектауда узган Муса Җәлил турнирында катнашты. 2021 елда әле Мәскәүдә Дөнья Кубогы ярышларда да катнашып беренче урынны яулаган иде.

Менә шундый хәлләр.