Португалия Тренеры Фернанду Сантуш: Роналду белән булган хәл уенга тәэсир итмәячәк (ФОТОРЕПОРТАЖ)

Португалия быелгы Конфедерацияләр Кубогының фаворитларының берсе. Команданың капкачысы Руй Патрисиу сүзләренчә, алар турнирдагы һәр уенга җитди карый.

- Иртәгә авыр матч көтә безне. Җиңү өчен барысын да эшлиячәкбез. Без монда шуның өчен килдек, - диде ул.

Португалия җыелмасы тренеры Фернанду Сантуш исә Россиягә команданы югары дәрәҗәдә кабул итүенә рәхмәт сүзләре җиткерде.

- Безнең өчен барлык шартлар да тудырылган. Футболчыларның бар таләпләрен үтәгәннәр. Мин монда берничә тапкыр булган бар инде, сез бик кунакчыл халык. Конфедерацияләр Кубогы безнең өчен мөһим этап. Монда барсы да чемпион, җиңү җиңел бирелмиячәк. Максатыбыз - бары җиңү, - диде тренер.

Якынлашучы уен мөһим чара булса да, журналистларны күбрәк Криштиану Роналду тирәсендә барган ыгы-зыгы кызыксындырды. Руй Патрисиу команданың Роналдуга карашы үзгәрмәде, ди.

- Ул бик яхшы спортчы, яхшы кеше. Безнең аңа караш үзгәрмәде, без аның яклы. Иртәгә булачак уенда ул үзен йөз процентка күрсәтәчәк. Роналду безгә һәрвакыт үрнәк булды, ул безнең өчен мөһим кеше, - диде Руй.

Тренер да Роналдуга тулысынча ышануын белдерде.

- Мин аны 18 яшемнән беләм. Ул көчле кеше. Аның белән булган хәлләр уенг тәэссир итмәячәк. Спортчы буларак та, кеше буларак та мин аңа тулысынча ышанам. Ул команда кешесе, - диде Фернанду Сантуш.

Журналистлар белән очрашудан соң футболчылар стадионга чыкты. Спортчыларның тренировкалары күтәренке рухта үтте. Алар үзара көлешеп, малай-шалалар кебек бер-берсен кортыртып рәхәтләнеп туп типте.