100 блогер сайлауларда күзәтүчеләр булачак

Татарстан Иҗтимагый палатасы рәисе Зилә Вәлиева киләсе атнада узачак сайлауларда күзәтүчеләр булырга теләк белдергән блогерлар белән очрашты. Зилә Вәлиева билгеләп узганча, яшьләр арасында, үз тавышының мөһимлеген аңлап, сайлауларга теләп баручылар да, миннән башка да хәл ителер әле дип, тавыш бирергә йөрмәүчеләр дә бар. Ә аларны сайлауларга җәлеп итүдә блогерларның роле зур. 
– Йөздән артык блогер мобиль төркемнәрдә күзәтүче булырга теләвен әйтеп, гариза язды. Алдагы сайлаулар күзәтүчеләрнең мөһим вазифа башкаруын раслады. Бу тавыш бирүне тагын да үтәкүренмәле итәчәк. Блогерларның һәрберсенең үз аудиториясе бар һәм бу бик зур потенциал. Моны без тавыш бирү вакытында күрербез дип уйлыйм, – диде ул.  
11-13 сентябрь көннәрендә республикада 2 806 сайлау участогы эшләячәк. 2 млн 937 мең кеше сайлау хокукына ия. Мондый масштабта тавыш бирүнең ачыклыгы, гаделлеге, бөтен процедураларның үтәкүренмәле булуы һәм сайлау нәтиҗәләренең беркемдә дә шик тудырмавы мөһим, диде Зилә Вәлиева. 
Сайлауларга яшьләрне җәлеп итү буенча да эш алып барылуын ассызыклап, Иҗтимагый палатаның яшьләр оешмалары белән актив эшләвен билгеләп үтте. 1 июльдә булган Бөтенроссия Конституциягә үзгәрешләр кертү буенча тавыш бирү көнендә күзәтүчеләрнең 25 проценты яшьләр оешмалары вәкилләре булган. Россия буенча алганда, бу сан уртача 15 процентны тәшкил итә. 
Очрашуда катнашкан блогерлар сүзләренчә, яңа тәҗрибә үзләре өчен дә кызыклы булачак. Алинә Гыймалтдинованың олы улы мәктәптә укый һәм ул әнисеннән сайлауларның ничек узуы, андагы процедуралар турында сораштыра икән. Сайлауларда катнашып, аның эчке ягын өйрәнгәч, улыма төгәл җаваплар бирермен дип уйлыйм, ди ул. 
Татар блогеры Илназ Габидуллин күзәтүче булырга тәкъдим килгәч үк ризалашкан. 
– Бөтен сайлауларда да актив катнашып киләм. Бу юлы күзәтүче вазифасын да башкарачакмын. Сайлауларда үземнең туган районым Кукмарага кайтачакмын. Моның җитди һәм җаваплы эш икәнен аңлыйм, әмма ул минем өчен зур тәҗрибә булачак, – диде ул.