«Акыл сатмыйк – коронавирус атлы хәвеф бетмәде»

– Татарстанда коронавирустан күпләп авырый башлау мисалы юк, ләкин хәл киеренке. Узган атнада COVID-19 йоктыруның беркадәр артуы күзәтелде. Республика буенча соңгы көндә 27 яңа очрак теркәлде, шулардан Казанда – 19 кеше, – диде Марина Трофимова.

Җәмәгать транспортында пассажирларның, кондукторларның, йөртүчеләрнең, шулай ук кибетләрдә кибетчеләрнең һәм сатып алучыларның медицина битлегеннән булулары шарт. Җәмәгать транспортын идарә итүче аерым кабинада булса гына битлек кимәскә мөмкин, пассажирлар белән аралашса, битлектән йөрү мәҗбүри. 

– Пик сәгатьләрендә дистанция саклау кыен, халык күп. Битлек барлык пассажирларда да булса, авыру башлангыч стадиядә чагында да башкаларга куркыныч тудырмый. Битлек вирус эләгүдән 100 процентка сак­лый, – дип киңәш бирде Марина Трофимова.

Казан шәһәре Башкарма комитеты җитәкчесе урынбасары Илдар Шакиров сүзләренә караганда, медицина битлеге кимәгәне өчен, 109 кондукторга шелтә белдерелгән, 49ы сентябрь премиясеннән үк мәхрүм калдырылган. Битлексез килеш кабат эләксә, эшеннән үк җибәреләчәк кондукторлар. Җәмәгать транспорты һәр көнне дезинфекцияләнә, ахыр­гы тукталышларда җилләтелә. Дезинфекция эремәсенең куәте бер тәүлеккә җитә.
Казан шәһәре муниципаль бе­рәмлеге башлыгының беренче урынбасары Денис Калинкин да коронавируска мөнәсәбәттә үзенең фикерләрен әйтте.

– Урамнарда, транспортта, кибетләрдә күзәтелгәнчә, кешеләрнең җаваплылык хисе йомшаруы сизелә, – диде Денис Калинкин, борчылып. – Аңлашыла – халык коронавирус шаукымыннан арыды. Ләкин онытмыйк – хәвеф бетмәде. Беребез дә авырырга теләмибез, туганнарыбыз һәм якыннарыбыз өчен борчылабыз, димәк, санитар чараларны үтәү кирәк. Якыннары авыр­ганнан соң коронавируска ышанмаучылар, аңа җиңелчә караучылар кимеде. Битлектәге кеше үзен генә түгел, җәмгыятьне дә саклый. Әйдәгез, белгечләр белән бәхәсләшмик. Коронавирусны җиңгәннән соң, акыл сатарбыз, ә хәзергә мәсьәләгә җитди карау зарур. 

Сүзен йомгаклап, Денис Калин­кин: «Ошыймы-ошамыймы, транспортта, сәүдә ­учреждениеләрендә һәм предприятиеләрдә ­санитар таләпләрнең үтәлеше тикшерелә­чәк», – дип кисәтте.