Татарстан Президенты Рөстәм Миңнеханов: «Пандемия үз юлы белән бара, безгә үз юлыбыз белән барырга кирәк»

- Бу проблеманы район башлыклары белән уртага салып сөйләшеп, шәһәр һәм авыл җирлекләре башлыкларына кагылышлы кадрлар мәсьәләсен хәл итәргә кирәк, - дип белдерде “Татарстан Муниципаль берәмлекләре советы” ассоциациясенең  рәисе Әгъзам Гобәйдуллин җирлек башлыклары утырышында.

Татарстан Президенты Рөстәм Миңнеханов та җирлекләрдә 1635 депутат сайлап куелганын  һәм депутатлар корпусының 34 процентка яңаруын искәртте. Ул шулай ук ТАССР оешудан алып, хәзерге көнгә кадәр республиканың районнары һәм шәһәрләре белән идарә иткән җитәкчеләр хакында мәгълүмат тупланган басма дөнья күрүен дә хәбәр итте.  

Җирлектәге вәзгыять күп очракта башлыктан тора. Аның халык белән аралаша белү, оештыра белү сәләте, халык алдындагы дәрәҗәсе булу мөһим. Әлбәттә, матди хәл дә соңгы урында түгел. Бу нисбәттән, республика җитәкчелеге җирлек башлыкларын игътибарсыз калдырмый. Соңгы 4 елда гына да җирле үзидарәгә караган 209 бина төзекләндерелгән, 43 яңа бина сафка бастырылган. ТР муниципаль берәмлекләре советы ассоциациясе утырышы алдыннан гына да ТР Президенты Рөстәм Миңнеханов үзидарәләргә 100 автомобиль ачкычлары тапшырды. Алар өчен бу зур ярдәм, әлбәттә.

Пандемия авыл һәм район җирлекләренә дә, республика тормышына да зур үзгәрешләр кертте.
- Авыл халкына килгәндә, авылда нәрсә кирәк? Эш урыны, керем булырга тиеш. Эш формасы нинди генә булмасын, без аларга ярдәм итәргә тиеш. Пандемия дип тормаска. Пандемия үз юлы белән бара, безгә  үз юлыбыз белән барырга кирәк, - диде Президент.  
Киләсе ел Туган телләр һәм халыклар бердәмлеге елы дип игълан ителде. Шуңа бәйле рәвештә, Рөстәм Миңнеханов муниципалитет вәкилләрен бу юнәлештә ныклап эшләргә өндәде.
- Киләсе елда узачак мөһим чараларның берсе — халык санын алу. Муниципаль хакимияткә аны тиешле дәрәҗәдә уздыру буенча зур җаваплылык йөкләнә. Сез тиешле шартлар тудырырга тиеш, - дип бурычлар йөкләде Рөстәм Миңнеханов.

Яңа елга санаулы көннәр калды. Президент җирлек вәкилләрен бу уңайдан да гозерен җиткерде.
- Бу бик зур дисциплинаны таләп итә торган эш. Бик күп корпоративлар булачак. Әйе, аларны үткәрергә кирәк, кешеләрне чикләргә кирәкми. Алар үзләре өендә җыелса әйбәтме, әллә инде без шартлар тудырып, алар Яңа елны культуралы, шартлар тудырылган урында үткәрсә әйбәтрәкме? Яңа елны кешеләр көтә. Без ничек кенә сөйләсәк тә, ул барыбер Яңа елны бәйрәм итәчәк. Шуңа Яңа елны да билгеләп үтәргә, куркынычсызлыкны да булдырырга кирәк, - диде Рөстәм Миңнеханов.

Лилия ЛОКМАНОВА