27 алтын безнеке!

Нәтиҗәдә республика 27 алтын, 8 көмеш, 9 бронза медаль яулап, команда буенча икенче урынга чыкты. Беренчелектә – Мәскәү, өченче урында – Мәскәү өлкәсе.

Яшь белгечләр белән Көньяк Сахалинда булган Спорт һәм социаль проектлар дирекциясе генераль директоры урынбасары Эмиль Гобәйдуллин сүзләренчә, Татарстан, инде Россия чемпионаты башланганчы ук, «WorldSkills» хәрәкәтендә лидерларның берсе булган.
– Без электән IT өлкәсендә көчле булдык. Казан мәгълүмат технологияләре һәм элемтә техникумында халыкара компетенцияләр үзәге эшли. Шулай ук педагогика, төзелеш, сәнәгать юнәлешләре элек-электән көчле иде. Максатыбыз «WorldSkills Russia» чемпионатында күбрәк медальләр яулау иде. Казан бит әле киләсе елга май аенда – Милли чемпионат, августта Дөнья чемпионатын көтә. Көньяк Сахалинда чемпионат оештыру эшендә Татарстан вәкилләре дә катнашты. Алар «WorldSkills» халыкара оештыру комитеты белән бергә эшләде. Бу безгә тәҗрибә туплау мәйданы да иде, – диде Эмиль Гобәйдуллин.

Нинди дә булса медаль яулау өчен, катнашучыга 500дән дә ким балл җыярга ярамый. Бу – әлеге һөнәр буенча үзеңнең оста белгеч икәнеңне күрсәтә торган билге. Вероника Салаватова, шул күрсәткечне узып, «Визуаль мерчендайзинг» компетенциясе буенча Россия чемпионатында беренче урын яулаган кеше. Вероника үзе әле Көньяк Сахалиннан кайтып җитмәү сәбәпле, без аның тренеры Вероника Сафина белән элемтәгә чыктык. Аның сүзләренчә, Вероника әлеге чемпионатка узган елның октябрь аеннан ук инде максатчан рәвештә әзерләнә башлаган.

– «Визуаль мерчендайзинг»ның асылы – кибет витриналарын, киштәләрне сатып алучыга уңайлы булсын итеп матурлап бизәү. Ярыш вакытында Вероника ике төрле бирем үтәде. Берсендә аңа горизонталь типта табак-савытны киштәгә матурлап тезәргә туры килде. Икенче биремне көнендә генә күрдек. Ул Сахалин белән бәйле рәвештә диңгез темасына багышланган иде. Верониканың төп максаты – товарларны сатып алучыны җәлеп итәрлек итеп тезү, товарны күбрәк сату иде. Ул эшен уңышлы башкарды, – ди тренеры.
Вероника Сафина сүзләренчә, Казанда әле визуаль мерчендайзинг киң таралмаган. Бу зур сәүдә үзәкләренең франшиза тибында эшләве белән бәйле. Димәк, Татарстан башкаласында яшь белгечләрнең үзен күрсәтү, дөнья дәрәҗәсенә чыгу мөмкинлеге зур. Мерчендайзерларның уртача хезмәт хакы – 20 мең сум.
– Безнең эш иҗат белән бәйле, шуңа да кемнең күпме хезмәт хакы алуы кешенең сәләтеннән, тырышлыгыннан да тора. 20 мең – башлангыч күрсәткеч кенә, – ди Вероника Сафина.

Быел Россия чемпионатында беренче тапкыр 14-16 яшьлекләр арасында «WorldSkills Russia Juniors» чемпионаты да узды. Алар олылар белән тигез дәрәҗәдә эшче һөнәрләрендә осталыкларын сынады. Нәтиҗәдә, мәктәп укучылары 8 алтын, 4 көмеш, 3 бронза медаль алып кайттылар.
Россия чемпионатында җиңүчеләр илнең киңәйтелгән җыелма командасына керәчәк. Хәзер аларны сентябрь аенда Будапешт шәһәрендә Европа чемпионаты көтә. Иң көчлеләр киләсе елга август аенда Казанда узачак Дөнья чемпионатында Россия данын яклый алачак. «Яшь профессионаллар» берлеге техник директоры Алексей Тымчиков сүзләренчә, Көньяк Сахалинда узган чемпионат җиңүчеләренең EuroSkills (Австрия), 2020 елдагы WorldSkills Competition (Кытай) чемпионатларында да катнашу мөмкинлеге бар.

Татарстан шулай ук авыр техникага хезмәт күрсәтү, авиация техникасына хезмәт күрсәтү, кирпеч салу, балта остасы, плитка ябыштыру, түбә ябу, мобиль робототехника, мәгълүмати кабель челтәрләре, график дизайн, мал табибы, флористика, ресторан сервисы, лаборатор медицина анализы, медицина һәм социаль хезмәт күрсәтү, мәктәпкәчә тәрбия, башлангыч сыйныфлар укытучысы, суыткыч техникасы һәм һаваны суыту техникасы буенча белгеч кебек юнәлешләр буенча Россия күләмендә беренчелеккә чыкты.

Дмитрий Дунин фотосы