Шәһри Казан

Эзләмәгез, мин ФИТНЕСТА

Минем дә фитнес-клубка йөрисем килә. Бөтен халык кырылып спорт залларына, бассейнга, фитнес-клубларга йөргәндә, нишләп әле мин өйдә утырырга тиеш ди? Фитнес белән шөгыльләнү хәзер модада бит! Моннан бер ел элек мин шулай уйлап йөрдем. Иртәгә барам, икенче атнаның дүшәмбесенә һичшиксез спорт залына язылам, дия-дия көннәр-айлар үтте. Ә мин һаман да...

Тик үзеңне гимнастика ясарга мәҗбүр итү генә авыррак. Аннан син ул физик күнегүләрне дөрес итеп ясыйсыңмы әле? Кайсы күнегүнең аркага, кайсының билгә, аяк-кулларга икәнлеген белмичә үзеңне генә ардырып ятмыйсыңмы диюем. Алга таба да шулай барган булыр иде. Аркам белән билем авыртып, табибка күренгәнче. Ә ул нәрсә киңәш итте дисезме? ЛФК, ягъни мәсәлән, лечебно-физическая культура. Өйдә дә шөгыльләнәм мин дип әйтеп карыйм, ә ул нинди күнегүләр ясыйсың дип сорый. Мин сөйләп күрсәткәч, ул һәр авыруның үзенә бер күнегүе булуын, ә мин иртә-кич ясый торганнары организмны тонуста тотар өчен генә икәнлеген аңлата. Күндерде ул мине ЛФКга йөрергә. Танышым эшли торган үзәктә дә бар икән курслар. Тик анда фәлән көннәрдә һәм сәгатьләрдә генә. Ә мин аның өчен эштән китә алмыйм. Аннары анда гел әби-бабайлар гына шөгыльләнә, алар арасында мин нишләп йөрим? Бердәнбер юл кала - фитнес-клуб эзләргә. Анысын чынлап та эзләргә туры килде. Иң беренче чиратта өемә якын булганын карадым. Үзебезнең йорт янында гына да бар ул фитнес-үзәк. Әмма анда бик кыйммәт. Берничә тукталыш кына барырлык урамда да бар фитнес-клуб. Анысы әлегә яхшылап эшләп китә алмый. Бәясе ярый анысы, әмма анда күрсәтелә торган хезмәтләр шул бәясенә таман гына туры килә. Саунасы, мунчасы юк. Төркем дәресләре өчен каралган зал кечкенә. Юк, миңа монда ошамады.
Эзли торгач, үземә кирәклесен таптым бит. Аллага тапшырып, шунда йөри башладым. Фитнеска йөрүемне белеп алган танышларым, син болай да кечкенә-ябык, анда нишләп йөрисең? Фитнеска йөреп, аяктан егыласың бит инде, дип мине жәлли. Менә шунда инде аларга фитнесның мода түгеллеген, ә сәламәтлек икәнлеген, анда ябыгу максатыннан гына йөрмәүләрен яхшылап аңлатырга туры килә. Чөнки аңладым, халык монда модага ияреп түгел, ә сәламәт, матур булыр өчен йөри. Акчаңны әрәм итеп йөргәнче, өеңдә генә шөгыльлән диючеләр дә бар. Аларга инде, бармагымны бөгә-бөгә, югарыда язып киткәннәремне сөйлим. Дөрес, фитнес дигәч, күпләрнең күз алдына тренажер заллары, штанг, гантельләр килә. Юк шул, фитнес-клубларда аңардан башка төркем дәресләре дә бар. Әйтик, калланетика, пилатес, йога, велоаэробика, бию, аэробика класслары, көч таләп итә торган класслар... Соңгылары үзләре әллә ничәгә бүленә. Ирләр өчен ирекле көрәш, армрестлинг, боксинг, кик-боксинг. Болардан кала, хамам, ягъни төрек мунчасы, фин саунасы, инфракызыл сауна, душ каралган. Бөтен җирдә дә чиста-пөхтә. Заллары якты, иркен, җиһазлары яңа. Аякка бахил кидерәләр. Мунчадан чыгучыларга сөлге бирәләр. Ятып хәл дә алырга була. Ашыкмыйча чәчеңне киптерергә, зур көзгеләр каршында ясанып-бизәнергә мөмкинлекләр бар. Фитнеска йөрүчеләрнең күплегенә караганда (әйтүләренчә, монда көн дәвамында 400-700 кеше йөри) фитнес-клуб бик популяр.
Бәяләренә килгәндә исә, болайрак: бер айга лимитсыз абонемент - 2000, өч айга - 4500, ярты елга - 6000, бер елга - 10000 сум (аларның сөлгеләрен файдалансаң, икешәр меңгә кыйммәтрәк). Бер тапкыр керү - 500 сум. Көннең теләсә кайсы вакытында сәгать иртәнге тугыздан кичке унга кадәр расписаниедә каралган теләсә кайсы дәрескә килеп шөгыльләнә аласың. Тренажер залы сәгать 7дән төнге 12гә кадәр эшли. Мунча, саунасы инде бушка. Пилатес, йоганың, армрестлинг, боксингның, биюләрнең кайбер төрләре түләүле. Абонемент алган кешегә бер коммерцияле дәрес - 100 сум. Студентлар өчен тагын да кулай вариант бар: иртәнге 9дан кичке 5кә кадәр йөргән очракта ярты ел - 4000гә, ә бер ел 6000гә генә төшә. Монда ук балалар фитнесы да бар. 5-13 яшьлекләргә төркем дәресләре бер айга - 1500, бер елга 7500 сум тора. Монда аларны көрәшергә өйрәтәләр. Теләүчеләр аэробика, йогага, нәфис гимнастикага, заманча биюләргә йөри ала. Пилатес, калланетикага хатын-кызлар гына йөри. Ул ирләр өчен генә икән дип ялгышмагыз. Берничә егет кереп шөгыльләнеп карады, әмма андагы мускулларны тарттыру күнегүләренең авырлыгына түзә алмыйча чыгып киттеләр. Юкка гына бер сәгатьлек калланетика бер тәүлек аэробика белән тиңләштерелмидер.
Миңа монда бик ошый. Вакытым булган саен барырга тырышам. Ни өчен дигәндә, аның файдасын күрә дә башладым. Акчасын түләдем, бармый булмый инде дип түгел, теләп йөрисең. Аннан чыккач, үзеңдә көч-энергия сизәсең, кәефең күтәрелә. Авылга кайтмаган атналарның шимбә-якшәмбеләрендә дә мунчасыз калам дип борчылмыйсың. Шөгыльләнгәннән соң иркенләп хамам керәсең, саунада утырасың. Сезгә дә киңәш итәм, ошамый калмас. Көзнең эчпошыргыч елак көннәрендә фитнеска барып, җиде кат тир чыкканчы велотренажерда, йөгерү тренажерында шөгыльләнеп, мунчада да парланып утырсаң, соңгы вакытта модага кергән депрессия турында да онытып торырсыз.
Фитнес-клубны сайлаганда нәрсәгә игътибар итәргә кирәк?
Иң беренче чиратта, өйгә яки эшкә якын булганын сайлагыз. Башта шул тирәдәгеләре белән танышып чыгыгыз. Машиналылар өчен фитнес-клубның үз парковкасы булу да яхшы.
Киенү-чишенү бүлмәсенә дә күз салыгыз. Иркен раздевалка теләсә кайсы клуб өчен зур плюс, әлбәттә. Тик монысы иң мөһиме түгел. Иң мөһиме - аның чиста булуы.
Теләсә кайсы клубның үз медицина белгече булырга тиеш. Сәламәтлегегез турындагы мәгълүматны карап, ул сезгә кирәкле фитнес төрен тәкъдим итә. Тренерлар составының квалификациясе белән дә танышырга иренмәгез. Нәрсә дисәң дә, сәламәтлегеңне алар кулына тапшырасы бит.
Фитнес залларында вентиляция системасы яхшы булырга тиеш. Андагы җиһазларны, идән өслеген карап чыгыгыз. Җиһазлар җитәрлекме, бик тузмаганмы, гомумән, алар шөгыльләнерлек дәрәҗәдәме.
Һәр көнне залда кизү торучы инструктор куелырга тиешлеген дә истә тотыгыз. Ул куркынычсызлык техникасы турында сөйли, тренажерларда эшләү тәртибе белән таныштыра. Инструктор кирәк вакытта ярдәм итү, булган сорауларга җавап бирү өчен һәрвакытта залда булырга тиеш.
Тагын бер мөһим пункт: фитнес-клуб хезмәтенең бәясе. Аларның күбесе клуб карталары алырга тәкъдим итә. Айлары күбрәк булган саен, бәясе дә кимрәк. Тик баштан ук берәр елга алып куярга ашыкмагыз. Бәлки, ул сезгә ошап бетмәс яки янәшәдә генә яңа клуб ачып куярлар.

Казан буенча фитнес-клубларның якынча бәяләре
Адоратский урамында урнашкан фитнес-клубта бер айлык абонемент - 2400, өч айлыгы - 6480, ярты еллыгы - 12240, бер еллыгы 23000 сум тора. Бер тапкыр керү - 250 сум. Бу үзәктә душ белән сауна гына бар, мунча юк.
Чуйков урамындагы фитнес-клубта (монда бассейн да бар): бер айга - 3500 (бассейнсыз), 4000 (бассейн белән), өч айга - 8400 (бассейнсыз), 9600 (бассейн белән), ярты елга - 14700 (бассейнсыз), 16800 (бассейн белән), бер елга - 25200 (бассейнсыз), 28500 (бассейн белән) сум түләргә туры киләчәк. Бер тапкыр керү - 500 (600) сум. Хамам, душы, саунасы бар.
Әмирхан урамындагысында (монда бассейн да бар): бер елга 15000нән алып 27000гә кадәр. Бер тапкыр керү, бер ай, өч ай һәм ярты еллык абонементлар каралмаган. Балалар фитнесы бер елга - 8200 сум.
Мәскәү урамындагы фитнес-үзәктә: төркем программалары залында - 8 дәресе 1440 (көндез), 2000 (кич), 16 дәресе 2720 (көндез), 3840 (кич), 24 дәресе 3840 (көндез), 5280 (кич), 32 дәресе 4800 (көндез), 6400 (кич). Тренажер залы - 8 дәресе 1600 (көндез), 2160 (кич), 16 дәресе 3040 (көндез), 4160 (кич), 24 дәресе 4320 (көндез), 5760 (кич), 32 дәресе 5440 (көндез), 7040 сумга төшә (кич). Бер тапкыр керү - 350 сум. Клуб карталары: бер айга - 2200, өч айга - 6000, дүрт айга - 7600 сум.
Белеп тор!
Фитнес-клубның расписаниесен кулга алгач, мин бер мәлгә аптырап калган идем. Монда дәресләр шулкадәр күп, күбесенең атамасын беренче тапкыр ишетүем. Йоганың нәрсә икәнен беләм. Әмма мин аның берничә төргә бүленүен, пилатесның калланетикадан нәрсә белән аерылуын белми идем. Шуңа күрә дә фитнес-клубка бара калсагыз, алар белән алдан ук таныш булыгыз:
Step power - гантель, амортизатор, манжет, бодибарлар белән степ-платформалардагы хореография.
Step combo - хореография элементлары кергән степ-аэробика.
Cycle recovery - стационар велотренажерларда төркемләп шөгыльләнү. Монда «спорт велосипеды»нда йөрү техникасы белән танышасың.
Push up - ирләр өчен генә каралган көч таләп итә торган дәрес. Күкрәк, җилкә, арканың өске өлеше мускулларын һәм прессны ныгыту өчен.
Pump - штанга кулланыла торган дәрес.
ABS - корсак прессы мускулларын күнектерүгә юнәлтелгән дәрес.
Bums+tabs - аяк, корсак прессы мускулларына тәэсир итү өчен махсус тупланган күнекмәләр.
Strip danke - төрле бию стильләре һәм юнәлешләре, шул исәптән стриптиз элементлары кулланылган дәрес.
Disko - диско стилендәге бию дәресе.
Latino - Латин Америкасы биюләренең төрле юнәлешләре кергән дәрес.
Latino mix afra - самбо һәм Африка биюе юнәлешләреннән торган дәрес.
Hip hop - рэп, хип-хоп стилендәге заманча «урам» хореографиясе.
Zumba - Латин Америкасы ритмнарын һәм гади хәрәкәтләрне үз эченә алган аэробика күнекмәләре.
Pilates - тәннең бөтен мускулларын күнектерүгә юнәлтелгән күнекмәләр системасы. Умыртка баганасына көч китерми.
Flex - мускулларны тарттыру һәм релаксациягә юнәлтелгән күнекмәләр комплексы.
Kallanetics - мускулларны тарттыру һәм кысуга юнәлтелгән статик күнекмәләр комплексы.
Yoga - тән һәм рухи гармониягә нигезләнгән, организмның бөтен системасын оптимальләштерүгә юнәлтелгән.
Hatha yoga - Аштанг-Виньяс һәм Айенгар йогалары катнашмасы.
Сыгылмалы көч - остеохондрозны дәвалау һәм профилактика максатыннан шөгыльләнүчеләр өчен.
Relax yoga - физик һәм психологик киеренкелекне тышкы яктан гына түгел, рухи яктан да бетерү өчен.

Реклама

Теги: 250
Нравится
Поделиться:
Реклама
Комментарии (0)
Осталось символов: