Казан сабан туена рәхим итегез!

Татарстан башкаласына 23 июньдә Сабан туена килегез! Казанда быел Сабан туе өч урында оештырыла: Тынычлык (Мирный) бистәсендәге Каенлыкта, Дәрвишләр бистәсендәге Каенлыкта һәм Киров районындагы Аккош күле буенда. Шулай ук Казан ипподромында ат чабышлары үткәрелә.

Сабантуйның өч мәйданында да абсолют батырга автомобиль бүләк ителә. 

Бәйрәм программалары Сабантуй мәйданнарында – 9.30 сәгатьтә, ә ипподромда 14.30 сәгатьтә башлана.

Тынычлык бистәсе
Тынычлык бистәсендәге Сабантуй – үзәк мәйдан. Бәйрәм республиканың бию һәм җыр коллективларының театраль тамашасы белән ачыла. Татар эстрадасының популяр артистлары Айдар Сөләйманов белән Данир Сабиров чыгыш ясый. Турецкий хоры махсус концерт тәкъдим итә.

Дәрвишләр бистәсе
Биредәге бәйрәм программасы шәһәрнең иҗат коллективлары катнашында «Казан сөлгесе» театраль тамашасы белән башлана. Сабан туеның хедлайнерлары – үзебезчә әйтсәк, сәхнә йолдызлары: Татарстанның халык һәм Россиянең атказанган артисты Салават Фәтхетдинов, татар эстрадасының популяр вәкилләре Гүзәлем белән Салават Миңнехановлар.

Аккош күле
Аккош күле тугаендагы Сабантуй сәхнәсендә татар эстрадасының танылган артистлары Зәйнәб Фәрхетдинова, Раяз Фасыйхов һәм Алсу белән Азат Фазлыевлар чыгыш ясый. Биредә «worldskills» дөнья чемпионатына багышлап аерым мәйдан оештырыла. Яшь һөнәр ияләре үзләренең осталыкларын күрсәтә.

Казан ипподромы
Ипподромда 13 чабыш үткәрелә, бәйгедә ахалтекин чабышкылары да катнаша. Монда концерт та була.
Сабантуй мәйданнарында республика районнары үз «ишегалларын» тәкъдим итә, кафелар эшли, татар халкының милли ризыклары, сувенирлар сатыла. 

Транспорт
Тынычлык бистәсендәге Сабан туена «Җиңү проспекты» метро станциясе, «10нчы микрорайон», Павлюхин урамындагы «Филармониянең концертлар залы» һәм «Глазунов урамы» (Теплоконтроль) тукталышларыннан махсус автобуслар йөри. Алар иртәнге 8дән бәйрәм тәмамланганчы хезмәт күрсәтә. Билет бәясе – 27 сум. Шулай ук «Казан-1» тимер юл вокзалыннан Тынычлык бистәсенә электр поезды йөреп торачак, билет бәясе – 22 сум.

Аккош күле буендагы Сабан туена 36нчы, 46нчы һәм 72нче автобусларда барып була. Әлеге автобуслар тамашачыларны Урман аръягы (Залесный) бистәсендәге «Ремплер» тукталышына кадәр китерә. Аннан халыкны Сабантуй мәйданына бушлай шаттл автобуслары алып китә.

Дәрвишләр бистәсендәге бәйрәмгә дә бушлай шаттл автобуслары тамашачыларны «Халитов урамы» тукталышыннан алып китә һәм кайтара. Моннан тыш, 1нче, 19нчы, 25нче, 34нче, 60нчы, 84нче һәм 91нче автобусларда барып була. 

Сабантуй көнне, ягъни 23 июньдә транспорт хәрәкәтенә вакытлыча үзгәреш кертелә. Автомобиль юлларында «Лесной городок» торак комплексыннан Ферма шоссесына кадәр һәм Мир урамыннан Солидарность урамына кадәр 05.00-17.00 сәгатьләрдә бер яклы хәрәкәт оештырыла. 

Казан ипподромына 13.30 сәгатьтән башлап 3нче троллейбус хәрәкәте көчәйтелә. «Җиңү проспекты» метро станциясеннән ипподром аша Горький паркына кадәр шаттл автобуслары җибәрелә.