Менә сиңа «вафли»? ...ашарга да, басарга да ярамый

Татарстанның Транспорт һәм юл хуҗалыгы министрлыгының матбугат хезмәте җитәкчесе Наилә Кливлеева сөйләгәнчә, «Вафли» тамгасы урам юлларына «Имин һәм сыйфатлы автомобиль юллары» илкүләм проекты кысаларында төшерелә. Казанның Париж Коммунасы урамы белән Сул як Болак урамы чатына 140 квадрат метрлы «вафли» төшерелгән иде инде. Күптән түгел мондый тамга берьюлы дүрт урам кисешкән Пушкин урамы белән Сәлимҗанов урамы һәм Татарстан урамы белән Уң як Болак урамы чатында барлыкка килде. Аның яссылыгы гына да 1600 квадрат метр.

– Казанда быел шушы ике участок кына планлаштырылган иде, башка урамнарга «Вафли» тамгасы төшерелми, – диде Наилә Кливлеева.

Татарстан Республикасы буенча Эчке эшләр министрлыгының ЮХИДИ идарәсе пропаганда хезмәтендә юл хәрәкәтенә кагылышлы яңалыкны түбәндәгечә аңлаттылар.

«Вафли» тамгасы юл чаты участогын күрсәтә. Ул сары төстәге буяу ярдәмендә төшерелгән үзара кисешкән диагональ сызыклардан гыйбарәт. Тамга аварияләр һәм бөкеләр еш күзәтелә торган светофорлы чатларга ясала. Пушкин урамы белән Сәлимҗанов урамы чатындагы «вафли» галәмәт зур булып тоелса да, нәкъ шул кадәр мәйдан игътибарлылыкны таләп иткән зонаны билгели.

Хәрәкәт юнәлешендә, әгәр юл чатында бөке хасил булган, ягъни машиналар тыгылышкан очракта, шулай ук светофорның яшел уты ахырында «вафли»га керергә ярамый. Чөнки аркылы хәрәкәт ясаучы машиналарга өстәмә киртә тудырыла. Юл билгеләрендә күрсәтелсә, сулга яки уңга борылыш ясарга мөмкин. «Вафли» тамгасы өстендә сулга яки уңга борылганда светофорның яшел утына юл аша чыга торган җәяүлеләрне үткәрү өчен, тукталыш ясап алырга ярый. Турыга хәрәкәтләнгәндә яки борылыш ясаганда, «вафли»да туктау тыела. «Вафли» юл тамгасы таләбен үтәмәсәң, Административ хокук бозулар кодексы нигезендә 1 мең сум штраф салына.

Фәрит Хәмидуллин, автоһәвәскәр:
– Мәскәүдә бу юл тамгасы төшерелгәнлеге турында белә идем. Казанда «вафли»ны беренче күргәндә гаҗәпләндереп җибәрде, хәтта. Мәскәүдән калышмыйбыз, дип уйлап куйдым. Казанның үзәк өлешендә бөкеләр еш хасил була, «Вафли» тамгасы бөкеләрне киметер, бәлки. Мин юл хәрәкәте кагыйдәләрен үтәргә тырышам, световорның яшел уты ахырында сары сызыклар өстенә кермим. Башкалар да тизлек режимына игътибарлы булсыннар иде, туктап калган машинага арттан килеп бәрелү ихтимал.

Фәрит Сиразов, автоһәвәскәр:
– Татарстан урамы белән Уң як Болак урамы чатына «Вафли» юл тамгасы төшерелүен хуплыйм. Транспорт чараларын идарә итүчеләр арасында үзара хөрмәт җитми, бөке хасил булганлыгын күрә торып, һаман тыгылыша бирәләр. Кагыйдәне үтәп йөргән очракта, аварияләр дә һәм бөкеләр дә кимер иде. Хәзер яңа тамганың үтәлешен күзәтергә кирәк, үтәлмәсә, бөкедән котыла алмаячакбыз.