Шәһри Казан

Сагынам мин гыйнварның салкыннарын...

Авылдагы картлар, хәтта әтиләр, без малай чакта кыш көне кар шуның кадәр күп ява торган иде, дип сөйләргә яраталар. Имеш, электр чыбыгына кадәр кул җитеп, аңа «тотынып» барып булган. Ялгыз торган берәр әбине еш кына йортыннан казып чыгаруларын бер кызык итеп искә алалар. Ул чакларда «кар да вакытында явып, яңгыр...

Хәзерге вакытта табигать саташуда. Җәй көннәрендә асфальтны эретерлек эссе, корылык. Кышларын да салкын димәс идек. Әле Яңа ел бәйрәмнәреннән соң бер суык көн булдымы икән?!. Юк шикелле: кар аяк астында эри, кибетләрдән туннар алып мәшәкатьләнәсе дә юк, язгы-көзге куртка да ярап тора. Минем бер дустым хәтта кышкы ботинка да кими, гел машинада йөргәч, аяк туңарлык булмый. Кышның «адәм төсле» булмавы аркасында гасырлар буе итек басып, шуны сатып гомер иткән гаиләләргә авырга туры килә. Җитмәсә, укалап-чукаланган Кытайда җитештерелгән итекләрне кибетләргә кертә башладылар. Киләчәктә чәкчәк пешерергә дә аларга заказ бирмәсәк ярар иде...
Кышның болай җылы килүе халыкка соңгы ун елда нык тәэсир итә башлады. Дөрес, элегрәк кышның җылынуына авыл халкы сөенде, тик хәзер инде күпкә китте. Чалган хайваннарның итләрен дә келәтләрдә саклап булмый. Шәһәр халкы да җәфа чигә: элек кыш көне балконны суыткыч урынына тотса, хәзер юк, нинди генә ризыкны чыгарып куйсаң да, бозыла. Бу кышның җылы килүеннән студент халкына да бик рәхәт түгел. Авылдан килгән итләрне пакетта тәрәзә аркылы бау белән асып кую заманалары үтеп бара. Элек без - бишенче курслар яңа килгән «дух»ларга итне ничек саклау технологиясен җентекләп сөйли, күрсәтә идек.
Быелгы кышның яз кебек булуын түбәләрдә эленеп торучы боз сөңгеләре дә искәртә. Элек аларны яз көне генә чистарталар иде, хәзер исә атна саен.
Кышның җылы килүе хәрбиләр, солдатлар өчен сөенеп туймаслык хәл анысы. Владивосток яки Хабаровскига эләксәң, халык әйтмешли, «шыкраеп катачаксың». Бу сиңа Идел буе гына түгел.
Гыйнвар аенда көндез температура 15 градустан артмый, кичкә таба гына төшә төшүен, әмма күп дигәндә дә 17-18 градустан артмый. Нәтиҗәдә көндез эрегән кар суы төнлә бозланып ката, иртә беләнгә руль артындагыларга һәм җәяүлеләргә менә дигән «сюрприз» ясый да куя. 25-30 градуслы суыкларны яшь буынга сагынып сөйләргә генә калып бара.

Реклама

Теги: 250
Нравится
Поделиться:
Реклама
Комментарии (0)
Осталось символов: