Саклан, өстеңә төшмәсен: Татарстанда кар астында калып гомере өзелгән әби фаҗигасеннән соң тикшерү дәвам итә

Күптән түгел генә Казанда Глушко урамындагы бер ишегалдында йорт  түбәсеннән кар төшеп, чит ил машинасының тәрәзәсен ваткан иде. Машина бер хәл, Чаллыда сигез яшьлек бер бала өстенә теплица түбәсеннән бозлы кар төшеп зыян китергән. Аны тиз арада хастаханәгә озатканнар. Бала җиңелчә имгәнүләр белән котылса, Лениногорскийда кар өеме астында калган пенсионер хатынның гомерен саклап кала алмаганнар. Бу вакыйга күпләрне тетрәндерде.

Бәла аяк астында дип юкка әйтмиләрдер, мөгаен. 1939 елгы ханым Лениногорск районының Тимәш авылына кызына кунакка килгән булган. Кызы кияве белән эш буенча шәһәргә киткән, кайткан төшләренә әниләрен таба алмаганнар. Баксаң, пенсионер 2 метр тирәсе биеклектән төшкән кар өеме астында калган була. Тикшерү фаразлары буенча әби өч сәгатькә якын кар астында яткан, һава җитмәүдән тончыгып үлгән. Бу эш буенча тикшерү эшләре дәвам итә.
Татарстанның торак-коммуналь хуҗалыгы өлкәсендә иҗтимагый контроль төбәкара үзәгенең җәмәгатьчелек белән элемтәләр буенча баш белгече Таһир Вәлиди аңлатуынча, күп катлы йортларда боз сөңгеләрен юк итү, түбәләрне кардан чистарту идарәче компания җаваплылыгында. Йорт торак милекчеләре ширкәтенә караса, бу мәсьәләне килешү төзелгән подрядчы оешмалар кайгыртырга бурычлы.  Шәхси йортларда исә түбәдәге кар, боз сөңгеләре өчен йорт милекчеләре үзләре җавап бирә.

–  Гомумән, күпкатлы йортларда боз сөңгеләре барлыкка килергә тиеш түгел, сезонлы сөңгеләр аңлашыла, әгәр дә алар гел барлыкка килә һәм еш очрый икән, димәк, йортның җылылык системасы дөрес эшләми, түбә җылытылырга тиеш түгел, бу җылылык өчен артык чыгымнар дигән сүз, моннан  тыш,  боз сөңгеләре барлыкка килүгә дә сәбәпче була”, –  ди Таһир Вәлиди.

Сак бул!

Гадәттәш тыш хәлләр министрлыгы белгечләре көннәр җылыну сәбәпле йорт түбәләреннән кар, кәрнизләрдән боз сөңгеләре төшәргә мөмкин дип кисәтә. Шуңа да куркынычсызлык кагыйдәләрен үтәргә киңәш итә.
Йорт, бина стеналарына якын килмәскә тырышыгыз. Биналардан чыкканда, кергәндә боз сөңгеләренә, түбәдәге карга игътибар  итегез. Аеруча балаларның куркынычсызлыгын кайгыртыгыз.
Автомобильләрегезне йорт янында ук калдырмагыз.

Әгәр дә йортыгызның түбәсенә кар күп җыелганын күрсәгез, идарәче компаниягә, хезмәт күрсәтүче оешмага мөрәҗәгать итегез.
Шәхси йортларда түбәләрне милекчеләр үзләре карап тора. Түбәдән кар төшергәндә саклык сорала.

Халык игътибарын җәлеп итү өчен коммуналь хезмәткәрләр махсус саклык чаралары күрергә, әйтик биналарга, йортларга  кар яки боз төшү куркынычы барлыгын хәбәр итүче игълан-такталар урнаштырырга тиеш.

Анна Арахамия фотосы