Татарстанның сәламәтлек саклау министры Марат Садыйков көн герое булды

Татарстанның сәламәтлек саклау министры Марат Садыйков Дубайдан Казанга очкан самолет бортында аңын югалткан ханымга ярдәм итә. Бу хакта бүген төрле каналларда чыккан хәбәрне «Татар-информ»га ведомствоның матбугат хезмәтендә дә раслаганнар.

Бер пассажирның хәле начарлангач, бортпроводник салонда табиб бармы-юкмы, дип ярдәм сораган.

Хәбәрне ишетеп, Марат Садыйков ярдәм итәргә алынган. Ул, кислород баллонын кулланып, хатын-кызны аңына китергән.

Алга таба хатын-кызга медицина ярдәме кирәк булмаган, самолет төшкәч, ул үзе чыга алган.