10 000 сум пособиене алырга теләүче юк? Гаризалар бик аз

Бер тапкыр бирелә торган 10 мең сумлык матди ярдәм буенча гаризаларны 15 июльдә кабул итә башлаячаклар. “Шәһри Казан” газетасы хәбәрчесе берничә район белән элемтәгә чыгып, яңа түләүләргә кагылышлы эшнең барышы белән кызыксынды. Әтнә районы Пенсия фонды клиентлар хезмәте (бүлек хокукларында) җитәкчесе Зөлфәт Галиев әйтүенчә, әлегә ике кеше гариза калдырган. “Мөрәҗәгать итүчеләргә документларны дөрес итеп рәсмиләштерергә бүлектәге хезмәткәрләр булыша. Әлегә чират юк. Күбрәк шалтыратып сорашалар,” - диде ул.

Зөлфәт Галиев,  ялгыз ата яки ана карамагындагы 8-16 яшьлек балалары булган, аз керемле гаиләләргә түләнәчәк матди ярдәм күләме – 4997,5 сум, йөклелекнең алтынчы атнасыннан уникенче атнасына кадәр сәламәтлек саклау учреждениесына мөрәҗәгать итеп, теркәлү узган хатын-кызларга  5311 сум икәнлеген искә төшерде.

Балтач районы Пенсия фонды бүлегенә әлегә бер кеше дә гариза калдырмавын  клиентлар хезмәте җитәкчесе урынбасары Алсу Сафина хәбәр итте. “Моңа кадәр булган түләүләргә интернет аша гариза тапшырган кешеләргә бу юлы да кыенлык тумас, дип уйлыйм. Коронавирус чоры булганга да, күбесе шул юлны сайлар, мөгаен,” - дигән фикерен җиткерде ул.

Азнакай районында да чират буенча ыгы-зыгылар тумавын, бары тик шалтыратуларның күплеген хәбәр иттеләр безгә. Биредә түләүләрнең “Мир” картасына күчереләчәген дә искә төшерделәр

Дания Нәгыйм