“Алар да безнең чама уйный” - татар артистлары туп тибеп кайтты

Илнең 16 төбәгеннән җыелган артистлар рәхәтләнеп туп типте, күңел ачты һәм җиңүчене ачыклады.

Капкачы хөрмәтенә
Быелгы турнир легендар футбол капкачысы Лев Яшинга 90 ел тулуга багышланды. Исән булса, Халыкара футбол федерациясе тарафыннан ХХ гасырның иң яхшы капкачысы булып танылган спортчыга 22 октябрьдә 90 яшь тулган булыр иде. Футбол белән аз гына булса кызыксынучылар Лев Яшинның капкачылар арасында “Алтын туп”ка лаек булган бердәнбер футболчы булуын да яхшы беләдер.

Шулай итеп, Олимпия һәм Европа чемпионы булып танылган капкачыны “Арт-футбол” фестивалендә дә искә алдылар: турнир азагында гала-матчта сәясәтче, артистлар торган “Росич-Старко” җыелмасына каршы капкачылардан торган “Лев Яшин” командасы чыкты. Нәтиҗәсе мантыйкка туры килә кебек – Россия һәм чит ил капкачыларыннан торган команда ышанычлы җиңү яулады – 7:3. 

Безнекеләр сынатты
“Быел без начаррак чыгыш ясаганбыз икән – 11нче урын. Штангаларга күп тидердек шул”, – дип язып куйган иде шоумен Фәнил Вакказов инстаграмына Татарстан командасының чыгышына бәя биреп. 

Турнирда Татарстан данын Фәнил Вакказов, Алмаз Шәрифуллин, Инсаф Бәдретдинов, Риназ Фазлыйәхмәтов, Илшат Вакказов, Илнар Хөсәенов, Фәрид Низамиев, Зөлфәт Сафин, Рамил Фәрзетдинов яклаган. 

Бу хакта безгә танылган алып баручы Илшат Вакказов җиткерде:

– Мәскәү бик җылы каршы алды. Узган ел белән чагыштырсак, турнирның дәрәҗәсе артуы сизелеп тора, командаларның әзерлеге көчле, – дип сөйләде безгә Илшат. – Узган ел 7нче урын алган идек. Быел төркемдәге уенның берсендә генә җиңеп, алдагы этапка узып булмады. Аның каравы шәп кәеф белән кайттык. Ял итү, аралашу, яңа танышулар... Турнирдан соң “Спартак” – “Арсенал” матчын тамаша кылдык. Безнең чама уйный икән инде алар да – шулай ук капкадан өскә тибәләр.

...16 команданы үзенә җыйган турнирда Татарстан артистлары Түбән Новгород, Воронеж һәм Мәскәү диаспоралары белән бер төркемгә эләккән. Кызганыч, беренче команданы гына отып (2:0), калган икесендә оттыра алар. Шуңа да көчлеләр төркеменә эләгә алмый кала. 

“Микрофон турниры” көтә
Татарстан артистларының нәрсәгә сәләтле булуын Мәскәү тамашачысы гына түгел, тиздән үзебез дә белә алачакбыз – иҗат әһелләре 4нче “Микрофон турниры”на әзерләнә башлады. 

– Россия җыелмасының элеккеге футболчысы Андрей Каряка. Мин бер тапкыр тупны бүген аның ике аяк арасыннан да чыгарып җибәрдем хәтта, ялгыш түгел, махсус! – дип фото урнаштырган Фәнил Вакказов инстаграмда.

Кем белә, бәлки безгә Фәнилнең үзен шул рәвешле алдау бәхете дә елмаер әле: 8 гыйнварда узачак “Микрофон турниры”нда җырчылар, театр артистлары гына түгел, радио хезмәткәрләре һәм журналистлар  да туп тибәчәк ләбаса!