Ашамлыклар тулы 50 чатыр, алты тулганчы ярминкәгә чаптыр

– Сөтне һәм каймакны иртәнге 9.30 сәгатькә сатып бетердек, менә ике йомарлам эремчек кенә калды, – дип, сөенечләрен уртаклашты Тәтеш районының Чагылдым авылыннан Альбина белән Рифат Фәйзуллиннар.

Биш ел элек крестьян-фермер хуҗалыгы оештырган яшь гаилә сыерлар асрый, пай җирләрендә күпьеллык печән үстерә.
– Дәүләттән грант алдык, ярдәм өчен зур рәхмәт. Ул акчалар эш башлангычында бик урынлы булды, – ди Рифат.

– Каймак, эремчек ясыйбыз, – дип иренең сүзен куәтләде Альбина.
Райондашлары Сөендек авылыннан Роза белән Зәкәрия Әхмәдиевләр 30 сарык асрыйлар, 40 оя умарта тоталар икән.
– Хатыным сатып тора, мин сарык түшкәләрен чабып өлгерә алмыйм хәтта. Алып бетереп баралар, – ди Зәкәрия Әхмәдиев.
Аллабирде авылыннан Равил Заһидуллин 20 ел элек умартачылык шөгыленә керешкән.
– Бабай да, әти дә умартачылар түгел иде. Үзлегемнән өйрәндем, башкалардан сораштым. Тәвәккәлләсәң, бара ул, – ди Равил Заһидуллин.

Җырчы кызларны фоторәсемгә төшергәндә, Киров һәм Мәскәү районнары хакимияте хезмәткәре килеп эндәште. Ни гаҗәп, исемен әйтмәде.
– Ярминкәдә атна саен уртача 50 чатыр була, үзешчән артистлар концерт куя, – дигән сүзләрен көчкә тартып алдым ханымның авызыннан. Шунысы өчен рәхмәт, ул мине Тәтеш вәкилләре белән таныштырды.

– Һәр шимбәдә 30-32 сәүдә чатыры корабыз. Агрофирмалар да, ­шәхси хуҗалыклар да бик теләп катнашалар ярминкәләрдә. Үпкәләш булмасын өчен, чиратлашып киләбез. Бездә сыер, ат, каз, күркә асраучы фермерлар күп. Умартачылык җанланды, кайбер авылларда унлап умартачы бар, – дип җанланып сөйләде Тәтеш районының авыл хуҗалыгы идарәсе җитәкчесе Ринат Хәкимов.
Казанда авыл хуҗалыгы ярминкә­ләре һәр шимбәдә 29 декабрьгә кадәр оештырыла. Сәүдә иртәнге 6.00 сәгатьтән көндезге 12.00-14.00 сәгатькә кадәр. Татарстанда җитеш­терелгән сыйфатлы продукцияне арзан бәяләрдән алып калырга ашыгыгыз!

Автор фотосы