Балалар сәхнәдә үсә

Театр аша балалар күңеленә дуслык, ярдәмләшү, үз максатына ирешүчәнлек кебек әхлак сый­фатлары салырга тырышабыз. Төр­ле халык әкиятләренә карата кы­зыксыну тудырып кына калмыйбыз, бу милләтләргә карата дуслык хисләре дә уятабыз. Балаларда театр сәнгатенә мәхәббәт тәрбиялибез.

Театраль эшчәнлек – бала иҗа­тының иң киң таралган бер төре. Образга кереп, бала төрле рольләрдә уйный. Бу аның кызыксынуын, сәләтен һәм мөмкинлекләрен үстерә. Бала яңа белемнәр алырга ашкына, ә бу үз чиратында киләчәктә аңа максатына ирешергә ярдәм итә.
Әсәрләрне, әкиятләрне сәхнә­ләштерүдә катнашып, балалар образлар, төсләр, авазлар аша тирә-юнь белән таныша, ә сораулар балаларны уйларга, анализларга, нәтиҗәләр ясарга өйрәтә. Театраль педагогика ысулларын куллану балаларның хәтерен, игътибарын, күзаллау сәләтен, сѳйләм чиста­лыгын, үзләренең тавышлары бе­лән идарә итү мѳмкинлекләрен, хезмәт сөючәнлекне үстерергә, шулай ук коллективта үз-үзләрен тотарга, кыюсызлыкны җиңәргә булыша.

Кечкенә генә спектакльдә катнашса да, бала үзен иркен тота башлый, аралашу күнекмәләрен үзләштерә, сѳйләм телен үстерә, тел байлыгы, иҗади активлыгы гына түгел, үз-үзенә ышанычы да арта.
Бакчабыз рус телле булып саналса да, балаларыбыз та­тарча сөйләшергә ярата һәм спектакльләрне дә татар телендә сәхнәләштерәләр. Аларга кызык булсын өчен, театрның төрле алымнарын кулланабыз: кашык театры, бармак театры, курчак театры...

Үзебез сәхнәләштергән әсәрләр белән конкурсларда катнашабыз. Балаларыбызга конкурсларда кат­нашу, бигрәк тә җиңүләр ошый. Театрыбызны оештыруга, аның өчен кирәкле җиһаз, киемнәрне, битлекләрне әзерләүгә тәрбиячеләр, әти-әниләр дә зур өлеш кертә. Тырышлыклары бушка китми, әти-әниләр үз чиратларында, баласының оста чыгыш ясавын күреп, сабыйлары өчен бик куаналар.

Балачакның кешенең бөтен тормышына нигез булып торуын, тормышының алдагы үр-бас­кычлары, аның уңыш һәм уңышсызлыклары шушы нигезгә бәйле булуын без бер генә минутка да исебездән чыгармыйбыз.
Бөек галим, мәгърифәтче, язучы, тарихчы Ризаэддин Фәхреддин: «Бала чакта алынган тәрбияне соңыннан бөтен дөнья халкы да үзгәртә алмас», – дигән фикерен юкка гына язып калдырмаган.

Киләчәктә дә без үз бакчабызда сөйләм телен үстереп, театр эшчәнлегебезне дәвам итеп, балаларыбызны да, аларның әти-әниләрен дә сөендерәбез дип уйлыйм.
 

Зөлфия Сираҗиева,

Казан шәһәренең 199нчы балалар бакчасы тәрбиячесе.