#Язмалар 05 мая 2022, 09:49

Батырлар онытылмый!

05 мая 2022, 09:49

Аллаһка шөкер,77 ел инде тыныч илдә, сугышларсыз яшибез. Ә бит безнең әти-бабайларыбызга мондый тормышны күрергә насыйп булмаган. Яшим дигәндә генә Бөек Ватан сугышы башланып киткән. Япь-яшь килеш дөнья күрмичә чит ил туфрагында ятып калганнар никадәр. Аларны инде кайтарып булмый. Тик хәтер яшәргә, исемнәре онытылмаска тиеш.

Скопировать ссылку

Апас районы Багыш авылы - Дан орденының тулы кавалеры Ислам Насыйбуллин туып-үскән данлыклы авыл. Сугыштан зур батырлыклар кылып, Берлинны азат итүдә катнашып, Җиңүне Эльба ярында каршылап, күкрәк тулы орден медальләр тагып туган ягына кайтып төшә Апас батыры. Гаилә корып җибәрә. Тик каты сугышның яралары озак сөенеп яшәргә ирек бирми. Ислам ага 62 яшендә бакыйлыкка күчә. Узган ел аның вафатына 40 ел булды. Ул чакта олы баласына 17 яшь булса, балалары бүген инде үзләре әби-бабайлар.

Апас үз батырының исемен онытмый, район үзәгендә Җиңү паркында мәрмәр тактага алтын белән язылган, туган авылы Багышта һәйкәл куелган. Ул укып белем алган Чирмешән төп белем бирү мәктәбе дә горурланып аның исемен йөртә.

Узган ел батыр яшәгән һәм бакыйлыкка күчкән Багыш авылы урамына аның исеме бирелде. Ул урамдагы йортларга истәлек такталары куелды. Әлеге чарада катнашкан батырның кызы Илсөяр Әхмәтҗанова үзенең шатлык яшьле күзләре белән: “Бу такталарны куйганда кош кебек очып йөрдем мин. Әтием истәлеген мәңгеләштергән өчен рәхмәт!” - дип, ихлас сүзләрен җиткерде.

Азат Мөхәммәтҗанов,
Казан.