“Без барыбыз да Зимфираның безнең тормышыбызда булуына сөенеп яшибез...”
Татарстанның атказанган артисты Илсур Мортаза танылган журналист, озак еллар «Сәхнә» журналында, филармониянең матбугат хезмәтендә эшләгән Зимфира Гыйльметдинова вафатына бер тулу уңаеннан матур бер пост тәкъдим итә.
Татарстанның атказанган артисты Илсур Мортаза танылган журналист, озак еллар «Сәхнә» журналында, филармониянең матбугат хезмәтендә эшләгән Зимфира Гыйльметдинова вафатына бер тулу уңаеннан матур бер пост тәкъдим итә.
Без үлгәннән соң безенең каберне җирдән эзләмәгез – мәгърифәтле кешеләр йөрәгеннән эзләгез (Җәлалетдин Руми.
Бер ел үтеп тә киткән. Бүген, “Мәрҗәни” мәчетендә, якын дустыбыз, күренекле шәхес, Зимфира Гыйльметдинованың елын үткәрдек. Ашны Ансар Хәзрәт алып барды. Кайгы аз гына булса да онытылсын, җиңелрәк кабул ителсен өчен бер ел гына аз икән шул әле. Зимфираны искә алып сөйләшкәндә бөтен нәрсә яңарды, күз яшләрен тыеп торырга туры килде. Ничек кенә булмасын, Зимфира яшәгән дәвердә туганнарын, дусларын яраткан кебек, бүген дә безне кабат берләштерде!
Әнисе, Мәймүнә апа бүген Зимфира белән бәйле, күргән матур төшен сөйләде. Без бу төштән Зимфираның без кылган гамәлләр белән кәнәгать булуын аңладык.
Иң мөһиме без барыбыз да Зимфираның безнең тормышыбызда булуна сөенеп яшибез. Ул инде бакыйлыкта булса да, рухы безнең белән!..
Зимфира Теләче районының Балыклы авылында туган булса да, Питрәч районының Ленино- Кокушкино авылында үскән, шунда мәктәпне тәмамлаган. Кокушкинода концерт куйганда, киләсе елның март аенда, аның туган көненә, аның истәлегенә концерт куярга вәгъдә биреп кайткан идем. Бүген ул мәсьәләне дә хәл иттек, минем бу ниятемне дуслар, туганнар хупладылар. Димәк без бу ниятне тормышка ашырачакбыз дигән сүз!
Якыннарыгызның, дусларыгызның кадерен исән чакта белегез! Югалткач, сагынып искә төшерергә генә кала. Үзегезне саклагыз, күңел көрлеге ташламасын!
Илсур МОРТАЗА,
Татарстанның атказанган артисты.
Кызыклы яңалыкларны күзәтеп бару өчен Телеграм-каналга кушылыгыз.
Комментарийлар