«Дуслар»да өй туе гөрли

Бу вакыйганы зарыгып көткән сабыйларны, ата-аналарны һәм педагогларны өй туе белән Казанның Киров һәм Мәскәү районнары башлыгы Сергей Миронов котлады.

"Соңгы ике атна эчендә генә без «Салават Күпере»ндә 3 балалар бакчасын ачабыз, - дип аңлатып китте Сергей Миронов,- Алар барысы да көтеп алынган. Һәм, һичшиксез, чират проблемасын хәл итәргә ярдәм итәчәк».

Ике катлы балалар бакчасының бинасы «Демография»милли проекты буенча төзелгән. Генподрядчы - «Ак таш»ҖЧҖ. Биредә ясли, кече, урта һәм өлкән төркем балалар өчен бүлмәләр җиһазландырылган. Һәр төркем өчен уен, йокы, киенү-чишенү бүлмәләре, буфет каралган. Моннан тыш, бакчада музыка һәм физкультура заллары, дәресләр үткәрү өчен бүлмәләр, медицина, кер юу һәм азык-төлек блоклары бар.

Учреждение педагоглар катнашында эшләнгән концепциясе белән аерылып тора.

«Балалар бакчасы бик матур, зур һәм уңайлы килеп чыккан», - дип бәяләделәр бәйрәмдә катнашкан ата-аналар
«Салават Күпере» микрорайоны үскәннән үсә бара, шуңа күрә мәктәпкәчә учреждениеләргә ихтыяҗ зур. Бүген биредә 1,5 меңгә якын чиратта торучы исәпләнә. Әмма әлеге өч яңа балалар бакчасы ачылганнан соң, бу катлаулы мәсьәлә хәл ителәчәк, дип күз уңаенда тотыла.

Мөдир Алена Шәмсиева сөйләгәнчә: "Балалар бакчасының исемен дә бергәләшеп, ата-аналарыбыз белән уйлап таптык. Иң яхшы, иҗади яктан якын килгән атама өчен инстаграмм сәхифәбездә бәйге игьлан иткән идек. Күпчелек тавыш буенча, «Дуслар» («Друзья») дигәне җиңеп чыкты. Исемебез җисемебезгә туры килеп, карашларыбыз, фикерләребез уртак булып, бер-беребез белән ярдәмләшеп, ихтирам итеп яшәргә, эшләргә язсын."

«Дуслар» да мәктәпкәчә яшьтәге сабыйны һәрьяклап үстерүгә «Игелекле бизнес» проекты, финанс белеме, менталь арифметика дәресләре кебек юнәлешләр ярдәм итәчәк. Спорт һәм иҗади сәләтләрне үстерүгә аерым игътибар биреләчәк.

Исегезгә төшерәбез, Казанның мәктәпкәчә белем бирү системасында барлыгы 319 учреждение эшли, аларда 75 меңнән артык мәктәпкәчә белем бирү учреждениесенә йөриләр. Быел шәһәрдә «Демография» милли проекты кысаларында ясле төркемнәре белән 10 мәктәпкәчә учреждение төзелде һәм «Торак»федераль максатчан программасы буенча бер балалар бакчасы төзелеше тәмамланды. Якындагы ике елда Татарстан башкаласында тагын 20 яа балалар бакчасы төзү планлаштырыла.

Лилия Гайнуллина