«Әфганстаннан чыктыгыз, «рухи сугышка» кердегез»

Совет гаскәрләре Әфганстанда 1979 елның 25 декабреннән 1989 елның 15 февраленә кадәр интернациональ бурыч үтәде. Татарстаннан гына да “әфган сугышында” 296 хәрбинең гомере өзелде.

- Әфган сугышында һәлак булганнарны искә алабыз, Сезнең батырлыклар алдында баш иябез,-дип сәламләде элекке сугышы-интернационалистларны Татарсттан премьер-министры урынбасары Ләйлә Фазлыева. - Сез исән, сез сафта, сез яшь буынны ватанпәрварләр рухында тәрбияләүдә актив катнашасыз.

Казан горнизоны командиры генерал-майор Кирил Кулаков үзенең чыгышында әйткәнчә, хәзер аналитиклар СССРның Әфганстанга керүенә төрле бәяләмә бирә.

- Гаскәр кертү-СССРның халыкара террорчылыкка каршы көрәш башлавы иде ул. Әфганстанга ярдәм йөзеннән юллар, мәктәпләр һәм торак йортлар төзелде, - диде Кирил Кулаков.

Казан Суворов училищесы җитәкчесе Валерий Миронченко әлеге сугышта шоферларның, очучыларның һәм саперларның хәрби хезмәтләрен батырларча үтәүләрен искә төшерде. Әфганчылар җәмәгать оешмаларының республика Министрлар Кабинеты каршындагы координация советы рәисе Иван Егоров сугыш хәрәкәтләрендә катнашкан элекке хәрбиләрнең мәктәпләрдә һәм коллективларда патриотик эшчәнлек алып барулары турында сөйләде.

Әфганстан сугышында солдат улы һәлак булган Галина Левшанованың чыгышы Ватан-Ана чакыруы кебек яңгырады.

- Сез үзегезне чын батырлар итеп таныттыгыз. Кызганыч, солдатлар һәлак та булды, кайсылары яраланды һәм имгәнде. Тормышта югалып калмадыгыз, балалар үстердеге, инде оныклар тәрбиялисез. Әфганстаннан чыктыгыз, ләкин, кайбер илләр Россиягә каршы идеологик яктан һөҗүм итә. Сез хәзер рухи сугыш сугышчылары, илебезнең чикләрен дә һәм рухи ныклыкны да саклыйк!-диде Галина Левшанова.

Митинг ахырында республика һәм шәһәр хакимияте вәкилләре, Татарстан Хәрби комиссариаты офицерлары,  әфганчы-интернационалистлар, сугыш ветераннары һәм яшь армиячеләр Мәңгелек ут һәйкәленә тере чәчәкләр салдылар. Әфганчылар җәмәгать оешмасының төбәк бүлеге рәисе Евгений Кабыш һәлак булган әфганчыларның каберләренә дә чәчәкләр салыначак диде.

Автор фотолары