Шәһри Казан

Гүзәл Мөбарәкова: «Бәйләү стрессны җиңәргә булыша»

Югары Ослан районында туып-үскән Гүзәл Мөбарәкованың кулыннан килмәгән эше юк. Белгечлеге буенча икътисадчы һөнәрен үзләштергән кыз бүген җырлар яздыра, бәйли, Россиядә иң зур компанияләрнең берсендә ишек­ләр сата.

12 яшьлек улы Тимурны үстерә. Аңа төпле белем, нигезле тәрбия бирергә тырыша. «Җитми дисәң, вакыт юк инде ул. Тик эшеңне яратып башкарсаң, һәрчак вакыт табарга була», – ди Гүзәл.

Бәйләргә алты-җиде яшьлек чагында әнисеннән өйрәнгән. Аннары мәктәптә бәйләү түгәрәгенә йөргән. Туганнарына, якыннарына бүләк һәрчак әзер булган аның – барысын да үзе бәйләгән башлык­лар, бияләйләр белән сөендергән. Кулы ияләнеп, тәҗрибәсе арткач, Гүзәл зуррак әйберләр: свитерлар, күлмәкләр бәйләүгә күчкән. Эшләнмәләрен фотога төшереп, кызык өчен генә социаль челтәргә куеп караган. Шуннан башланган да инде. Кызыксынып шалтырата башлаганнар. Заказ бирүчеләр арткан. Бәйләргә өйрәт әле, дип мөрәҗәгать итүчеләр дә күп икән.

Реклама

– Кул эшләре татар халкында элек-электән бар. «Аулак өй»­ләрдә кызлар чигә, тегә, бәйли торган булган. Татар кызы кул эшләрен белергә тиеш, дип саныйм. Бу кәсеп итү өчен генә түгел, күңел рәхәтлеге өчен дә кирәк. Мәсәлән, бәйләү начар уйлардан арындыра, тынычландыра, стрессларны җиңелрәк кичерергә ярдәм итә, – ди Гүзәл.
Ул соңгы арада кулдан бәйләнгән әйберләргә караганда, кибеттән әзер кием-салым сатып алучыларның артуына да борчыла. «Җан җылыңны биреп бәйләгән киемнәр җылырак та була бит», – ди үзе.

Гүзәл кечкенәдән җырга-моңга гашыйк. Татарча, русча, инглизчә, испанча җырлый, һәр җырчының үз җыры булырга тиеш, дип саный. Тик әлегә тамашачыга таныткан үз җыры юк. Дөрес, шигырьләр иҗат итә. «Шигырьләремне кешегә тәкъдим иткәнем юк, җырлар яздыра башладым. Бәлки киләчәктә зур сәхнәләргә чыгарга да насыйп булыр», – ди Гүзәл Мөбарәкова.

 

Нравится
Поделиться:
Реклама
Комментарии (0)
Осталось символов: