Ишегалдың өчен тавыш бирергә онытма!

Безнең йорт мәхрүм калмыймы?
Төзелеш, архитектура һәм торак-коммуналь хуҗалык министрының беренче урынбасары Алексей Фролов республика халкын җәмәгатьчелек мохитен, шулай ук ишегалларын төзекләндерү эшчәнлегендә үзләренең фикер-тәкъдимнәре белән актив катнашырга чакырды.
 – Цифрлы технологияләрне бик үк белеп бетермәгән өлкәннәр тавыш бирүдән мәхрүм калмыймы соң? – дип, “Шәһри Казан” исеменнән сорау бирдем.
 – Тавыш бирүдә 200 волонтер ярдәм итәчәк. Алар Казан, Чаллы, Түбән Кама, Әлмәт, Бөгелмә, Чистай, Алабуга, Яшел Үзән, Лениногорск шәһәрләрендәге күп функцияле үзәкләрдә өлкәннәргә теге яки бу ишегалды турында хәбәр җибәрүдә булышачак. Башка район хакимиятләре моны үзләре оештыра ала,-дип аңлатма бирде Алексей Фролов.

– Торак милекчеләре ширкәтләре тавыш бирергә хокуклымы?
– Ишегалларын төзекләндерү программасында барлык төр милек формасындагы йортлар да катнаша. Торак милекчеләре ширкәтләре һәм торак-төзелеш кооперативлары йортларында яшәүчеләр дә тавыш бирергә хокуклы, –диде Алексей Фролов.

Дәүләт идарәсен цифрлы үстерү, мәгълүмати технологияләр һәм элемтә министрының беренче урынбасары Илья Начвин әйткәнчә, Татарстанда 2,5 миллион кеше дәүләт хезмәт күрсәтүләре порталында теркәлгән.

Тавыш бирү өчен Татарстан Республикасы дәүләт хезмәт күрсәтүләре порталында сораштыру үткәрелүе турындагы баннерга басарга яки gorodsreda.tatar.ru сайтына күчәргә кирәк. “Услуги РТ” мобиль кушымтасында тавыш бирү “Опросы жителей” бүлегендә башкарыла.

Президентның 6923 ишегалды
“Татарстан Республикасы шәһәрләрен үстерү институты” фондының стратегик проектлар белән идарә департаменты җитәкчесе Венера Камалова сөйләгәнчә, республикада 2015 елдан башлап 443 парк һәм сквер яңартылган. 
 – Татарстан Президенты Рөстәм Миңнеханов башлангычында 2019 елда “Безнең ишегалды” республика программасы старт алды. Узган ел 1091 ишегалды комплекслы төзекләндерелде, быелгы планга 1074 ишегалды кертелде. Программа кысаларында биш елда 2014 елга кадәр төзелгән йортларның 6 923 ишегалдын капиталь төзекләндереп чыгу ниятләнелә, – диде Венера Камалова.