23 июнь көнне Казан Сабан туе узачак. Бәйрәм чаралары шәһәрнең дүрт мәйданчыгында оештырыла, төп бәйрәм чарасы Тынычлык бистәсендәге Каенлыкта үтә. Шәһәрлеләрне һәм кунакларны халык күңел ачулары, иҗади мастер-класслар, кул эшләре ярминкәсе һәм спорт ярышлары белән бай программа көтә, дип хәбәр итә Казан мэриясе матбугат үзәге.
Концерт программасы Каенлыкта берничә бәйрәм мәйданчыгында узачак. Тамашачылар өчен сәнгать осталары, эстрада йолдызлары, шулай ук Казанның һәм Татарстанның иң яхшы иҗат коллективлары чыгыш ясаячак.
Барлык теләүчеләр дә капчык белән көрәштә, авыш бүрәнәдә йөрүдә, көянтә-чиләк күтәреп йөгерүдә, капчык киеп сикерүдә, кашыкка йомырка куеп йөгерүдә, шулай ук аркан тарту, чүлмәк вату, гер күтәрү, армреслинг, көч сынашу кебек спорт ярышларында катнаша ала. Милли көрәш буенча ярышлар Сабан туеның иң якты чараларының берсе булачак. Иң көчле һәм җитез катнашучыларга истәлекле сувенирлар һәм призлар бирелә.
Импровизацияләнгән авыл утарларында кунаклар татар халкының көнкүреше һәм декоратив-гамәли иҗат осталарының кул эшләре белән танышачак. Гадәттәгечә, көн дәвамында аттракционнар белән балалар мәйданчыгы эшләячәк, шулай ук яшь тамашачылар өчен аниматорлар белән интерактив уеннар һәм төрле конкурслар оештырыла. Балаларны иҗади мастер-класслар, аквагрим, пони һәм атларда йөрү көтә.
Бәйрәм Каенлыкта 9.30 сәгатьтә башлана.
Шул ук вакытта халык күңел ачулары Дәрвишләр бистәсендә һәм Аккош күлендә узачак. Башкала халкы һәм кунаклары өчен концерт программасы әзерләнгән, анда Татарстан артистлары, шулай ук фольклор ансамбльләр һәм коллективлар чыгыш ясый. Спорт мәйданчыкларында милли конкурслар һәм ярышлар уза, ә балалар өчен күңел ачу программалары белән аерым мәйданчыклар оештырыла. Шулай ук территориядә татар халкының мәдәниятен һәм көнкүрешен чагылдыра торган авыл ишегаллары урнаштырылачак, аларда районнарның иҗат коллективлары чыгыш ясаячак.
14.30 сәгатьтә «Казан» халыкара ат-спорт комплексында Сабан туе хөрмәтенә ярышлар узачак. Башкала халкы һәм кунаклары ат чабышын һәм татар эстрадасы йолдызларының бәйрәм концертын карый алачак. Ипподромның төп трибуналар комплексы холлында күргәзмә була.
Быелгы бәйрәмдә бер яңалык та бар: Киров һәм Мәскәү районнары администрациясе иң яхшы «Казан сөлгесе» конкурсы игълан итте. Иң яхшы сөлгеләр Аккош күлендә Сабантуй музеенда тәкъдим ителәчәк.
Сөлге җыю – татарларда Сабан туе алдыннан уздырыла торган йола. Элек яшь хатын-кызлар, кызлар сөлгеләргә ел буе бизәк чиккән. Сөлгеләрне батырларга биргәннәр һәм ат иярләренә бәйләгәннәр. Чиккән сөлгеләр иң яхшы батырга бирелгән. Сөлгене биргән вакытта алар теләк теләгәннәр. Һәр кыз Сабантуй җиңүчесендә, батырның атында үзенең бәйрәмгә дип чиккән сөлгесен күрергә хыялланган.
Бүген татар бизәкләре чигелгән сөлгеләр гаиләләрдә әлеге сөлгеләрне барлыкка китергән ата-бабаларның истәлеге буларак саклана. Ләкин хәзер дә бәйрәмгә сөлге чиккән гаиләләр бар.
Конкурста катнашу өчен үзең һәм туганнарың чиккән сөлгенең фотосын Instagramда урнаштырырга кирәк. Соңыннан аның барлыкка килү тарихын язарга һәм #КазанскоеПолотенце (#КазанСөлгесе) хештэгын куярга кирәк.
Фото: www.kzn.ru
Иң мөһим һәм кызыклы язмаларны Татмедиа Telegram-каналында укыгыз
