Казанда аквапарк ябыла?

Туган көнне шунда гына уздырырбыз дигән идек тә, аквапаркка шалтыраткач, телефонны алмадылар. Барып карасак, ул бөтенләй эшләми икән. Ни өчен аквапаркны япканнар? Ул кайчан ачылачак соң?»

Әлфия Һадиева, Казан.

Мәҗит Гафури урамындагы күңел ачу комплексы чынлап та әлегә ябык. Татарстанның Югары суды карары белән, күңел ачу үзәгенең эшен вакытлыча туктатырга булганнар. Сәбәбе – бинада шәһәр төзү законнары һәм янгын куркынычсызлыгы таләпләренә җавап бирмәгән тәртип бозулар күзәтелгән. Дөрес, үзәкнең администрациясе моның белән килешеп бетә алмый. «Барионикс» аквапаркының рәсми сайтында хәбәр ителгәнчә, бинада янгын куркынычсызлыгы белән бәйле 120 җитешсезлекнең күбесен төзәткәннәр, бары документларны рәсмиләштерүгә кагылышлы хаталарны рәткә китерәсе генә калган. Моны Гадәттән тыш хәлләр министрлыгы белгечләре дә раслады, диелә сайттагы хәбәрдә. Әмма әлегә күңел ачу үзәге барыбер ябык. Үзәк администрациясе тиешле органнардан рәсми җавап көтә.

Чынлыкта үзәктә кешегә бернинди дә куркыныч янамый, диелә сайттагы хәбәрдә. 2015 елда да аквапаркны ябу турында сүзләр йөргән иде, ул чакта бар җитешсезлекләрне төзәттеләр. 2015 елдан алып 2018 ел аралыгында янгын куркынычсызлыгы буенча күп нәрсә эшләнгән, заманча сигнализацияләр куелган, ялкынны автомат рәвештә су белән сүндерү җайланмасы көйләнгән, ул-бу була калса, кешеләрне эвакуацияләү, төтенне суырту, порошок ярдәмендә янгын сүндерү – барысы да яңартылган. Бу эшләр өчен барлыгы 150 миллион сум акча сарыф ителгән.

Күңел ачу үзәгенең ябылуы турында хәбәр анда эшләүче хезмәткәрләрне дә борчый. Үзәк ябылса, 500дән артык хезмәткәр эшсез калачак дигән сүз. Казанда күңел ачу үзәкләре күп булса да, туристлар, халык бу урынны якын итеп өлгергән иде инде. Бер билет белән бөтен уеннарда күңел ачу мөмкинлеге биргән уникаль парк та Казанда бердәнбер иде.

Администрация хәбәр иткәнчә, аквапаркта елына кимендә 70 мең турист ял иткән. Аеруча гаилә белән су коену өчен уңайлы урын булып саналган ул. Океанариумда диңгезгә бармыйча да ташбакаларны, крокодил, чын акулаларны күрергә мөмкин булган. Үзәк ябылган очракта ул хайваннарны кая куярга дип тә борчылалар. 3 меңнән артык су хайваны, акула, сирәк очрый торган балыклар, пингвиннар – барысы да зыян күрергә мөмкин.

Дөрес, борчылырга әле иртәрәк. Үзәк вакытлыча ябылган. Ничек кенә булмасын, хәзер кеше йөрмәгәч, акча да керми. Димәк, үзәк бушка эшли. Коммуналь хезмәтләр өчен генә дә бу зур бинага аена ике миллион сумнан артыграк акча түләргә кирәклеген исәпкә алсаң, мондый шартларда үзәк күпмегә түзәр, билгесез.