Казанда Май чабу чарасы ничек үтәчәк?

Казанда киләсе уикендта кышны озатуга һәм язны каршылауга багышланган халык күңел ачулары узачак. Май чабу – борынгыдан ук Русьта билгеләп үтелгән якты һәм күңелле бәйрәм, аның гореф-гадәтләре белән шәһәр халкы һәм кунаклары якындагы ял көннәрендә таныша алачак. Чаралар берничә мәйданчыкта планлаштырылган, программада – рус халык уеннары, театр тамашалары, киез итекләрдә хоккей, концерт, коймак ярминкәсе һәм Май чабу карачкысын традицион яндыру.

Кремль яр буенда Май чабу

13-нче март көнне 11.00 сәгатьтә

Бу көнне казанлылар рус халык уеннарында һәм призлар уйнату, такмаклар бәйгесендә, яшьләр биюләрендә һәм уеннарында катнаша, тимераякта һәм балалар аттракционнарында шуа, әкият персонажлары катнашында тамаша, Петрушка театры, цирк сәнгате элементлары белән номерлар карый алачак.

Кремль яр буе территориясендә декоратив-гамәли сәнгать осталары эшләнмәләре ярминкәсе узачак, җәяүлеләр, халык биюләре, саксыз курчаклар һәм истәлекле тәңкәләр ясау буенча мастер-класслар оештырылачак.

Май чабу бәйрәме вакытында туклыклы ризыклар – пылау һәм шашлык, тәмле коймак, кайнар эчемлекләр белән тамак ялгап алырга мөмкин булачак, дип хәбәр итә оештыручылар.

Бәйрәм традицион йола – Май чабу карачкысын яндыру белән тәмамланачак.

Аккош күлендә Май чабу

14-нче март, 10.00 сәгатьтә

Май чабу бәйрәме мәйданчыгы гадәттәгечә Кече Аккош күле территориясендә оештырылачак. Биредә фуд-корт, кышкы активлык һәм киез итекләрдә хоккей өчен мәйданчыклар, фотозоналар һәм анимация зоналары оештырылачак.

Бәйрәм кунаклары өчен концерт программасын Казанның мәдәни үзәкләренең һәм учреждениеләренең район һәм шәһәр фольклор коллективлары әзерли. Май чабу карачкысын яндыру 12.50 сәгатькә планлаштырылган, ә 13.00 сәгатьтә концерт программасы башланачак, дип хәбәр итә Киров һәм Мәскәү районнары администрациясе матбугат хезмәте.

Бу көнне Аккош күленә кадәр килүче җәмәгать транспорты эше көчәйтеләчәк. Шулай итеп, «Лебяжье» тукталышына кадәр 36-нчы, 46-нчы һәм №72-нче номерлы автобуслары йөриячәк. Халыкка уңайлы булсын өчен бу маршрут автобуслары эш көне графигы буенча эшләячәк. Бәйрәм кунаклары өчен төп парковка Аккош күле ягыннан Горький шоссесы буйлап планлаштырылган. Шәхси транспорт хуҗалары өчен Тирән күлгә керү ягыннан өстәмә парковка урыннары әзерлиләр, шуңа да карамастан, Горький шоссесында тоткарлыклар булмасын өчен, шәһәрлеләрне җәмәгать транспортыннан файдаланырга чакыралар.
Исегезгә төшерәбез, Казан музейларында май чабу атнасы башланды, 8-нче марттан 14-нче мартка кадәр төрле мәйданчыкларда бәйрәм программалары оештырылды. Шәһәр халкы һәм кунаклары халык уеннарында катнаша, кышны патша заманында ничек озатканнарын һәм, әлбәттә, чәй белән коймактан авыз итә ала. Шулай ук бәйрәм чаралары Казан шәһәре Башкарма комитетының Мәдәният идарәсе тарафыннан шәһәрдәге бистәләр һәм микрорайоннар мәдәният йортларында оештырылачак.

https://kzn.ru/