Казанда “Сообщество” Россия Федерациясе Иҗтимагый палатасы форумы уза

Россия Иҗтимагый палата секретаре Лидия Михеева форумда җитмештән артык субъект вәкилләре катнашуын белдерде. “Сәхнәдә Казахстаннан килгән коллегабыз булганга гына форумны халыкара дип санавыбыз түгел. Эш шунда ки, без дөньяның 20 иленнән килгән чит ил кунакларын биредә катнашырга чакырдык”, – диде ул. 
Форумга килүчеләр һәм онлайн караучылар саны 1,5 меңнән артык иде. 

“Казахстан, Греция һәм башка илләрдән килгән чыгыш ясаучылар, нәкъ менә гражданнар, барлык илләр халыклары дөньяны яхшы якка үзгәртә ала, дип ышана”, – диде Лидия Михеева. Ул республикабызның гасырлар буе төрле мәдәниятләр һәм гореф-гадәтләрне берләштерүен ассызыклап үтте. Бик күп төрле милләт вәкилләре биредә дус һәм тату яшәвен, монда Көнчыгыш һәм Көнбатыш, Европа һәм Азия очрашуын әйтте. “Нәкъ менә шушы искиткеч кешеләрдән безгә бердәмлек буенча өйрәнерлек әйберләр бар”, – диде Россия Иҗтимагый палата секретаре.

Татарстан Президенты Рөстәм Миңнеханов сүзләренчә, бүген “Сообщество” – җәмгыять, бизнес һәм хакимият арасында әңгәмә өчен абруйлы мәйданчык, идеяләр эзләү һәм актуаль карарлар кабул итү урыны. Форум алга баручылар өчен, диде ул.

“Ачык һәм көчле дәүләттә җәмәгатьчелек катнашыннан башка тормышның бер генә өлкәсен дә күз алдына китереп булмый. Безнең илкүләм лидерыбыз Владимир Владимир улы Путин гражданлык җәмгыяте үсеше мәсьәләләренә зур игътибар бирә. 
Форумның бай программасы Россиянең иң яхшы тәҗрибәләрен күрсәтү һәм фикер алышу өчен зур мөмкинлекләр бирер, дип ышанам”,  – диде Рөстәм Миңнеханов.

Президент республикабызда 173 милләт һәм барлык традицион дин вәкилләре тату яшәвен билгеләп үтте. Безнең митрополит һәм мөфти һәрвакыт бергә булуын да ассызыклады. 

“Милләтара һәм диннәр арасындагы татулыкны ныгыту безнең өчен аерым кайгырту булды һәм шулай булып кала да. Форум темасы бик актуаль. Россия ул – мәдәниятләрнең күптөрлелеге һәм гражданнарның бердәмлеге. Бу сорауларда без гражданнар җәмгыяте институтлары белән тыгыз элемтәдә торабыз”, – дип сөйләде Татарстан Президенты. Андый иҗтимагый оешмаларның саны алты меңнән артып китә, һәм алар арасында Татарстан халыклары Ассамблеясы, Бөтендөнья татар конгрессы, Мөселманнар Диния нәзарәте, Татарстан Рус православие чиркәве дә бар. 

“Сезнең күпләрегез өчен мәдәниятләр диалогын үстерү һәм традицион конфессияләргә ярдәм итү эшендә республика туплаган тәҗрибә кызыклы булыр дип ышанам”, – диде Рөстәм Миңнеханов.