Уйлап карасак, инвалидлар өчен уңайлы тирәлек дигән сүз нигезендә бик зур аспект ята. Кызганычка, кайбер оешмаларның җитәкчеләре бу шартларны нормаль халәттә эшләп бетерми, ди Рифат Ганибаев.
Бүген - 27 июнь, Конституциягә үзгәрешләр кертү буенча тавыш бирүләрнең өченче көне. Шимбә көн булгангамы, Казанның К. Тинчурин урамында гый 51 нче номерлы мәктәп бинасына урнашкан 48 нче номерлы сайлау участогында кеше өзелми. Әмма Роспотребнадзор таләпләре дә үтәлә, чират җыелып тормый.
Әлеге участокка тавыш бирергә бүген Татарстан Инвалидлар берлеге рәисе Рифат Ганибаев та килгән иде. Рифат әфәнде әлеге мәктәптән ерак түгел генә яши. Өстәвенә, ул анда беренче сыйныфны тәмамлаган булып чыкты.
- Конституциягә үзгәрешләр кертү буенча тавыш бирүемнең сәбәбе - уңайлы тирәлек институтын тудыру белән бәйле. Бу инвалидларга гына түгел, аз хәрәкәт итә торган башка кешеләргә дә кагыла. Әлеге институт һәрдаим үсештә булырга тиеш. Уйлап карасак, инвалидлар өчен уңайлы тирәлек дигән сүз нигезендә бик зур аспект ята. Кызганычка, кайбер оешмаларның җитәкчеләре бу шартларны нормаль халәттә эшләп бетерми. Мисал өчен, пандуслар урынына ракетадан оча торган "комплекслар" куелган. Шәһәрдә җәмәгать транспорты да җайлаштырылмаган, уйлап бетерелмәгән. Без бу хакта күп сөйлибез. Уңайлы мохит ул бит инвалидлар өчен генә түгел. Теләсә кайсы кеше инвалидлыктан сакланылмаган. Бу яшь балалы әниләргә, вакытлыча сәламәтлеген югалткан кешеләргә, олы яшьтәге гражданнарга да мондый шартлар булдыру кирәк, - дигән фикердә Рифат Ганибаев.
Билгеле булганча, тавыш бирүләр 1 июльгә кадәр дәвам итәчәк. Шимбә һәм якшәмбе көннәрендә сайлау участоклары сәгать 14.00 гә кадәр эшли. Эш көннәрендә исә тавыш бирүләр сәгать 8.00 дән 20.00 гә кадәр оештырылган.
Лилия Локманова
Иң мөһим һәм кызыклы язмаларны Татмедиа Telegram-каналында укыгыз
