Шәһри Казан

“Халык контроле” системасына көн саен 300гә якын хәбәр килә

Татарстанда электрон рәвештәге “Халык контроле” системасы эшчәнлеген Россия Президенты Владимир Путин да мактап телгә алган. Министрлар Кабинетында 14 июльдә онлайн сыйфатта узган брифингта моны Татарстан Республикасында кеше хокуклары буенча Вәкаләтле вәкил Сәрия Сабурская әйтте.

Татарстанның дәүләт идарәсен цифрлы үстерү, мәгълүмати технологияләр һәм элемтә министры урынбасары Радик Гыйсмәтов таныштырганча, бездә “Халык контроле” системасы 8 ел элек эшләтеп җибәрелгән. 

– Көн саен 300гә якын гариза-хәбәр керә. Ел башыннан инде 39 мең хәбәр алынды. Мөрәҗәгать итүчеләрнең 61 проценты - хатын-кызлар. 25-44 яшьтәгеләр активлык күрсәтә. Кешеләр территорияләрне төзекләндерү, юллар төзелеше, хәрәкәт иминлеге, торак-коммуналь хуҗалык һәм коронавирус мәсьәләләрендә элемтәгә чыктылар. Башкалар күтәргән мәсьәләгә 79 мең кеше теләктәшлек белдерде. “Халык контроле” системасына кергән гаризаларны өйрәнү һәм чишү белән 800 дәүләт һәм муниципаль хезмәткәр шөгыльләнә, - диде Радик Гыйсмәтов.

Сәрия Сабурская дәвам итеп сөйләгәнчә, Казан, Чаллы, Актаныш, Апас, Әтнә, Чүпрәле, Минзәлә, Түбән Кама, Саба мөрәҗәгатьләрне чишүгә җаваплы карыйлар.
– Казанда җәяүлеләрнең җир өсте юл кичүләрендә лифт-платформаларның эшләмәве турында хәбәр кергән иде. Җиңү проспектында, РКБ янында һәм Оренбург трактындагы кичүләрдә лифтлар эшли башлады. Калганнарында лифтларны төзекләндерү һәм эшләтеп җибәрү барышы күзәтчелектә тотылачак, – диде Сәрия Сабурская.

Реклама

Ел башыннан “Халык контроле”ндә “Ветеран янәшәдә яши” һәм Covid-19 адреслары гамәлгә куелган. Бөек Ватан сугышында Җиңүнең 75 еллыгы хөрмәтенә эшләтеп җибәрелгән адреска 29 гариза кергән, шуның 25е үтәлгән инде. Мәсәлән, Казанның Имәнлек урамында сугыш ветераны яшәгән йортның тортуары начар булганлыгы турында хәбәр кергән булган, тротуар төзекләндерелгән. “Ветеран янәшәдә яши” адресына Түбән Кама һәм Тукай районнарында Бөек Ватан сугышы корбаннарына куелган һәйкәлләрне төзекләндерү соралганлыгы турында язганнар. Бу районнарда һәйкәлләрне төзекләндерү буенча мәсьәлә ахырынача чишелеп бетмәгән әле.  Коронавирус пандемиясе сәбәпле кертелгән үзбикләнү режимы барышында кешеләр волонтерлар эшчәнлеге, медицина битлекләре турында кызыксынган.

“Халык контроле”нә кергән 39 мең мөрәҗәгатьнең 26 меңе чишелгән. Сәрия Сабурова искәрткәнчә, әгәр мәсьәлә чишелмәсә яки канәгатьләнерлек дәрәҗәдә хәл ителмәсә, мөрәҗәгатьне “Халык контроле”нә кабат куясың. 

Теге яки бу урында ялган спиртлы эчемлекләр белән сәүдә оештырылганлыгы турында төгәл хәбәр җибәргән кешегә акчалата премия бирелә, хәтта. Экологияне саклау кануннарын бозучыларны фаш иткән кешеләр дә бүләкләнә.
- Үзенең гаризасы үтәлгәч, кешедә хакимияткә ышаныч туа. “Халык контроле”н актив файдаланырга кирәк, бер генә мөрәҗәгать тә игътибарсыз калмый, чишү чаралары башлана. Юллар төзү буенча кергән мөрәҗәгатьләр генә кайчак, көне-сәгатендә чишелеш таба алмый. Бу планлы башкарыла торган эш, ләкин хәбәр барыбер исәптә тора һәм чишелешкә этәргеч ясый, – диде Сәрия Сабурская.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: