«Хатлар йорты» проекты яңа коллекциясен тәкъдим итте

Энҗе презентацияне “Искусство жить” мәдәни-мәгърифәти киңлекне тормышка ашыручы Айсылу Насыйбуллина белән таныштырудан башлады:

“Айсылу белән “Хатлар йорты” башланып киткән генә вакытта таныштык. Ул тәбрикләмәләребезне шундый күп итеп алды! Аннан соң үзенә чакырды һәм без якыннанрак таныштык. Айсылудан ачык хатларыбыз турында фикерен сорадым. Ул рәссамнар белән эшли башларга тәкъдим итте. Бу фикерне мин күңелемнең бер почмагына салып куйдым һәм соңрак әлеге идеяне тормышка ашырдык”.

 Яңа коллекциянең рәссамы – Лилия Гәрәева. Аның ярдәмендә башка вакытта да тәбрикләмәләр дөнья күргәне булды. Яңа ачык хатлар туганлык темасына багышланган. Бу коллекциядә юморга төрелгән ачык хатлар да бар. Алары “KARA” оешмасы белән берлектә эшләнгән. 

“Хатлар йорты” проектының логотибы ике мәгънәгә ия: бер яктан караганда, ул ковертның ачык халәте, икенче яктан караганда, гади татар йортына охшаган. Гомумән, йорт, гаилә, нәсел, нигез – бу темалар – татарның иң төп, тормышында зур роль уйный торган темалары. Безнең иң популяр ачык хатлар гаиләгә багышланган”, – дип аңлатып үтте Энҗе Садыйкова.

 “Хатлар йорты” проектының максаты – татар телен табигый рәвештә куллану; халыкны, милләтне, туганнарны берләштерү; аралашу. 

Әлеге проект 8 елдан артык эшли. Соңгы ике ел эчендә 8 яңа коллекция булдырылган. Алар арасында ислам дөньясы, ретро хатлар, җырлы хатлар, шәхесләр серияләре дә бар. 

Ике ел эчендә 36 мең тәбрикләмә һәм ачык хатлар бастырылган. Шуларның 23 500 данәсе инде сатылган. 

 “Тәбрикләмә, ачык хат – ул су да, ипи дә, кием дә түгел. Ул куркынычсызлыкка да бәйле түгел. Ул соңгы чиратта кирәк әйбер. Аннан башка яшәп була. Шуңа да карамастан, шундый зур саннарда кешеләр ала икән, Аллаһка шөкер, халыкта акча да, кызыксыну да бар, тел дә яши дигән сүз”. 

 “Татмедиа”га Энҗенең килеп керүе безнең дөнья өчен бер яңалык булды. Өч ел элек төрле яңа проектлар эзли башладык. Һәм открыткаларның күпләп сатылуын күрдек. Бу чын мәгънәсендә бизнес проект. Бу “Татмедиа”га милли кодның килеп керүе. Әлбәттә, безнең төрле газета-журналларыбыз да, радио-телевидениебыз да бар. Ләкин менә шушы кечкенә генә открыткалар проекты эчтәлек ягыннан, милли кодны, татарлыкны тарату ягыннан зуррак көчкә ия”, – диде әлеге чараның мәртәбәле кунагы – «Татмедиа» акционерлык җәмгыяте директоры Шамил Садыйков.

 Кичәдә шулай ук Камал театры артисты Фәнис Җиһанша да катнашты. Ул Әнгам Атнабаев шигырен укып узды һәм Энҗе Садыйкова белән хезмәттәшлек итү тарихын сөйләде.