Шәһри Казан

Хәмдүнә Тимергалиева үзе генә түгел: “Курган”да көненә ничә кеше җирләнә?

Казанның М-7 трассасында урнашкан “Курган” зираты узган ел ачылды. Иң беренче булып анда Татарстанның халык артисты Хәмдүнә Тимергалиева җирләнде. Зиратка барып, андагы вәзгыятьне карап кайтырга булдык. 

Без килгәндә, зират ишегалдында трактор кар чистарта иде. Күзебезгә башка адәм әсәре күренмәде дисәм, кайтыр алдыннан администрация бинасында бер хезмәткәргә тап булдык. Шуңа игътибар иттем: зиратта бер кабердә дә чардуган белән кабер ташы юк. Барлык каберләргә язулы такта куелган. Шундый кагыйдәләр.

“Курган” зиратының уң ягында мөселманнар, сул ягында христиан кешеләре җирләнә. Биредә VIP дип саналган аллеядә иң беренче Хәмдүнә Тимергалиева, ә аның янәшәсендә Татарстанның халык артисты Винера Ганиеваның ире Камил Фәйзрахманов каберләре урнашкан. Дөрес, бераз баргач, тагын бер кабер бар, ләкин кар булу сәбәпле, без анда кадәр керә алмадык. Бөек Ватан сугышы һәм сугыш хәрәкәтләре ветераннарын җирләү өчен дә аерым аллея бар.

Реклама

Башка каберләр зиратның нәкъ уртасындагы аллеядә урнашкан. Алар узган елның сентябрь аеннан дата буенча җирләнеп барган. Без барган көнне “Курган”да биш кеше җирләнгән булган, аларның икесе – татарлар, өчесе – руслар. Кайвакыт көненә хәтта 11 кеше дә җирлиләр икән. Татарлар белән чагыштырганда, биредә руслар күбрәк җирләнә. Мәрхүмнәрнең 40 проценты – татарлар, 60 проценты – руслар. Бу хакта безгә администрация бинасында утыручы егет әйтте.

Егет сүзләренчә, мәрхүмне “Курган”да җирләү 19800 сум тора икән. Хезмәткәрләр 1 метрга 2 метр мәйданны үзләре казып әзерләп бирә. Биредә якын кешең янында урын алып кую мөмкинлеге дә бар. Сүз уңаеннан, җир бәясе – 13500 сум. Кыскасы, мәрхүмне соңгы юлга озату якынча 35 мең сумга төшә.

50 елга каралган “Курган” зираты 147,5 мең урынга исәпләнгән, диләр. Зиратның мәйданы коточкыч зур, әлбәттә. Ләкин үлүчеләр саны да аз түгел бит. “Курган”дагы җир кишәрлеге 50 елга ук җитәрме икән? 
 

Эльвира ШАКИРОВА

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (2)
Осталось символов:
  • 23 февраль 2021 - 22:45
    Без имени
    Абау. Теге доньядала виплар бар.
  • 23 февраль 2021 - 22:08
    Без имени
    VIPлар турыдан туры ожмахка керэ микэн? Гади эшче халык та алардан аз кэч куймый бу дэньяда