Күктән акча да ява: лотереяга билет отучылар тарихы

Мәскәү янында яшәүче Надежда Бартош исә гыйнвар башында миллиард сум акча отты! Әй кызыктылар инде аның бүләгенә. 1 гыйнвар көнне телевизор каршында лотерея билетлары тотып утыручылар аз булмагандыр. Хәер, ни сөйлим соң, үзебезнең гаиләдә дә барысы да 6-7 билет алган иде бәйрәм уңаеннан. Танышларым арасында да “баерга” җыенганнар бар икән. Төркемдәшем – 78 сум, хезмәттәшем 100 сум откан.

Шәхсән минем лотереяга 250 сумнан артык акча отканым юк. Андый нәрсә белән бик мавыкмыйм да. Күрәсең, бу уңыш эше. Барысы да Надежда ханым кебек күлмәк белән тумый бит!

Сүз уңаеннан, аңа лотерея билетларын туган көненә бүләк иткән булганнар. Баксаң, хәзер инде бай бичә булган Надежа 31 декабрь көнне туган икән. Әмма миллиард артыннан ире һәм кызы белән  9 гыйнвар көнне генә килгән ди. Әле алар билетны да 3 гыйнварда гына тикшереп караган.

- Мин тикшереп караган беренче билетның бүләге бер миллиард сумлык иде. Башта ышанмадым, ялгышлык килеп чыккандыр дип уйладым. Яңадан тикшереп карадым – экранда цифрлар үзгәрмәде, – ди җиңүченең кызы.
Миллиард сум откан ханым бүләкнең бер өлешен бизнеска тотарга, ә бер өлешенә истәлек буларак, үзенә бизәнү әйбере алырга планлаштыра икән.

Байлыкның бит аның икенче ягы да бар. Күрәсең, Надежда ханымны аптыратучылар күп булган. Ул хәтта социаль челтәрдәге шәхси сәхифәләрендә фамилисен дә алыштырган ди.
Ә бит алар бары 100 сумга билет сатып алган булган. Әле бит миллиардны да быел беренче тапкыр гына уйнаттылар. Моңа кадәр андый бүләкне уйнату булмаган. 53 миллион кеше арасыннан нәкъ сиңа эләксен әле 1 миллиард! Йөрәгең ярылыр, билләһи!
Миллиард ук отмасалар да, Казанда да лотерея ярдәмендә миллионер булучылар җитәрлек. Узган ел гына да әллә ничә казанлыга шундый бәхет елмайган. Төгәлрәк әйткәндә, 26 татарстанлыга күктән акча “яуган”. 2018 елда мондый бәхет 19 кешегә тәтегән булган.
Мисал өчен, 15 ноябрьдә Татарстан башкаласында яшәүче 18 миллион сумга якын акча оту бәхетенә ирешкән.

Узган ел миллионер булган ир-егетнең берсе билетта 13 һәм 14 саннары күреп сатып алган булган. Баксаң, бу аның һәм улының туган көннәре икән.

“Билет сатып алуга бик җитди карадым. Уен  тәмамланганнан соң миңа смс-хәбәр килде. Миллион оттым ахры, дип уйладым. Карасам, чыннан да шулай. Җиңүемне белдергән хәбәр булды”, – ди ул.
Татарстанлы Галина һәм Рафаэль Айзатуллиннар да бергә тора башлауларына 40 ел тулу уңаеннан лотерея билеты алган булган. Рубин туйлары җиткәч кенә, көтмәгәндә миллионер булабыз, дип алар һич тә уйламаганнардыр, мөгаен. Өстәвенә, парлар күптәннән теплоходта сәяхәткә чыгарга хыялланган. Бүләкләрен дә шуңа тотачакларын әйткәннәр. Әлбәттә инде, әби белән бабай буларак, оныклар да өлешсез калмаган. Айзатуллиннар аларга да бүләкләр әзерләгән.

Иң зур бүләкне узган елның март аенда Казанда яшәүче һәм риэлтор булып эшләүче егет откан. Ул Көньяк Сахалинда яшәүче белән суперприз — 310 миллион сумны бүлешкән. Казан егетенә 155 миллион сум “тәтегән”.

Әлбәттә, күп кеше моңа ышанмый. Ничек инде 100 сумга билет сатып алып, миллионлаган сумнар оталар? Бу алдан сөйләшенгән эштер, ди. Әмма лотерея уеннары оештыручылар башка фикердә.
Баксаң, 2019 елның беренче яртысында лотерея билетлары сатып алучылар 23 процентка арткан. Татарстанда исә бәхетен сынап карарга теләүчеләр 21 процентка күбәйгән.

Сүз уңаеннан, зур суммада акча откан очракта билетның ялган булмавы 40 көн эчендә тикшерелә. Акча исә ярты ел эчендә җиңгән кешенең исәп-хисап счетына күчерелергә тиеш.

Надежда Бартош җиңүеннән соң күпләр билетларын тикшерергә дип почта бүлекләренә, яисә билетларны сатып алган кибетләргә барган. Социаль челтәрләрдәге Алабуга, Лениногрск, Әлмәт кебек шәһәрләрнең төркемнәрендә билетларның дөрес булмаулары, кайбер очракта барлык саннар сызылып та, отучылар исемлегендә булмаулары ачыкланган.
“Шәһри Казан” дәүләт лотереясының рәсми сайты аша оештыручыларга әлеге сорауларны берничә тапкыр юллап караса да, кызганыч, ике атна эчендә җавап килмәде.

Шуңа да җиңел генә баерга теләсәгез, лотерея билетларын рәсми сату нокталарыннан гына алырга киңәш итәбез.

Лилия ЛОКМАНОВА