«Королек – птичка певчая» сериалы йолдызы Айдан Шенер – татар кызы

Әбисенең әтисе Казаннан. XIX гасыр ахырында, көчләп чукындырудан качып, алар Төркиягә күчеп киткән.
– XIX гасырның икенче яртысында – татарларны күпләп чукындыра башлагач күченгәннәр. Ул вакытта күп кенә мөселманнар, христиан динен кабул итәсе килмичә, туган шәһәрләрен калдырып, Төркиягә күчеп китәргә мәҗбүр була. Тарих башкача булган булса, мин Казанда туган булыр идемдер, – дип сөйли Шенер үзе турында.

Әбисенең әнисе исә Кырым татары. Пәрәнҗә киеп йөрмәсә дә, ислам традицияләрен хөрмәт итә, дини бәйрәмнәрне билгеләп үтә.
Айданның иң беренче уңышлары модель бизнесы белән бәйле. Ул илнең иң матур хатын-кызы да булып танылган. 1981 елда «Төркия гүзәле» бәйгесендә җиңгән. Ул вакытта аңа 18 яшь булган. Чибәр кыз үз иленең данын якларга “Дөнья гүзәле” конкурсына да бара, әмма анда планетаның иң чибәр кызы исеменә Венесуэладан Пилин Леон лаек була.  

Айданның иң зур уңышлары исә актерлык эшчәнлеге белән бәйле. Аның актерлык кареьерасы «Маленький рейс» телесериалыннан башлана. «Королек – птичка певчая» сериалындагы Фәридә ролен башкарып, ул дөньяга таныла. Соңрак «Млечный путь», «Два лица Стамбула», «Заклейменные розы», «После долгих лет» һәм башка сериал-фильмнарда да истә калырлык рольләр башкара.
Хәзер Айдан ханым театрда уйный, рекламаларга төшә, шул исәптән социаль рекламаларга да.

Актрисаның шәхси тормышы җайлы гына бармый. Бала чагы гадәти була – Килис шәһәрендә музыка белгече гаиләсендә туа. Аннары әти-әнисе белән Бурсага күчеп китә. Шунда мәктәпне тәмамлый. Аннары модель һәм актриса карьерасы башлана. 1983 елда «Галатасарай» клубында уйнаган футболчы Айхан Акбинга кияүгә чыга. Биш елдан йолдызлы парның кызлары Эджем туа. 1991 елда Айдан ире белән аерылыша. Ире аның популярлыгыннан көнли, фанатлары ачуын китерә торган була. Шуннан соң хатынының туган көненә пәрәнҗә бүләк итә. Иреннән киткәч, актрисага өйләнергә теләүчеләр була. Әмма ул ялгызы гына кызын тәрбияләргә карар кыла. Эджем актриса була, берничә сериалда төшә. Әмма архитектура һәм дизайн белән кызыксынып китә дә шул юнәлештә эшли башлый.
Айдан тарихи ватаны турында онытмый, Татарстанга берничә тапкыр кайтканы да бар. Үзе белән йә әтисен, яки башка туганнарын алып кайта.  
2004 елда аны Татарстанның Мәдәният министрлыгына чакыралар. Төркия кунагы Сабан туенда катнаша, татар-төрек лицееның чыгарылыш кичәсендә һәм халыкара Евразия бөтендөнья мирасы шәһәрләре конференциясендә була.

2007 елда Шенер «Алтын Мөнбәр» III халыкара мөселман киносы фестивален ябу тантанасында катнаша.
2013 елда кабат Татарстан башкаласына Казан халыкара мөселман киносы фестиваленә кунак буларак килә.  
Айдан Шенер актив җәмәгать эшен алып бара, хәйриячелек белән шөгыльләнә.

(milliard.tatar)