Коронавирустан вакцина беренче чиратта кемнәргә ясалачак?

ТР сәламәтлек саклау министры Марат Садыйков бүген “ТатарстанОнлайн” программасы кысаларында, республика халкы сорауларына җавап бирде.

Билгеле булганча, яңа коронавирус инфекциясенә каршы вакциналарны сынаулар бара. Шул исәптән, Россиядә дә.

- Вакцина куркынычсыз һәм нәтиҗәле булырга тиеш. Күп кенә фармацевтика оешмалары аны үзендә тизрәк булдырырга тырыша. Вирус үзгәрә. Әлеге вирус ахырына кадәр өйрәнелмәгән. Иммунитет тотрыклы түгел дип тә әйтәләр, - ди Марат Садыйков.

Министр сүзләренчә, вакцина, беренче чиратта, өлкәннәр, шикәр авырулы кешеләр, симерүдән интегүче кешеләргә ясалачак. Әлегә бу категориягә кергән кешеләрне ачыклау бара.