Көрәштә җиңүчеләргә премияләр дә биреләчәк

31 гыйнварда Баулы районында Татарча көрәш федерациясенең утырышы узды. Бу хакта “ШК” хәбәрчесенә танылган көрәшче, җырчы һәм композитор Вил Усманов хәбәр итте.

– Баулы районы хакимияте белән берлектә федерациянең бер еллык эшчәнлегенә йомгак ясадык. Федерацияне Риф Васиков җитәкли башлаганнан соң төбәктә боз кузгалды, көрәштә үсеш күзәтелә башлады. Һәм мондый чара да әле беренче тапкыр гына уздырылды, – дип билгеләп үтте Вил Усманов.

Бу урында шунысын да искәртү урынлы булыр: узган ел нәтиҗәләре буенча Баулы районы көрәштә бер ел эчендә иң зур үсешкә ирешкән команда булып та танылды.

– Шунысы да сөендерә: очрашуга яшь көрәшчеләр генә түгел, аларның әти-әниләре дә чакырылган иде, – дип сөйләде Вил Усманов. – Көрәшнең үсеше буенча алга куелган бурыч-максатлар билгеләнде, сорауларга ачыклык кертелде. Гомумән, җылы бер очрашу булды бу.

Танылган көрәшче җиткергәнчә, утырыш барышында ярышларда катнашып җиңү яулаган көрәшчеләргә премияләр дә бирелгән һәм республикакүләм ярышларда уңышка ирешкән өчен моның ише бүләкләрне алга таба да тапшырырга сүз куешканнар.

Очрашып сөйләшүнең икенче көнендә җирле федерация вәкилләре Баулы районының Кызыл Яр авылында булып, яшь көрәшчеләрнең күнегүләрен дә тамаша кылган.