#Язмалар 19 мая 2019, 14:15

Лампочканы сайлый бел

19 мая 2019, 14:15

Кыш айларында эшләгән җылыткычлар әлегә ял итә. Ләкин электрны кышын да, җәй көне дә кулланабыз. Энергиягә сакчыл лампочкалар турында ишеткәнем бар. Нинди лампочкалар соң алар? Газетага белгеч аңлатмасын бирсәгез иде. Нәҗип Сабиров, Казан.

Скопировать ссылку

Казанның «Мәскәү районы торак-коммуналь хуҗалыгы» идарәче компаниясе белгечләре әлеге хатка түбәндәге җавапны җибәрде.
Электр энергиясен сакчыл куллануга шушы ысуллар аша ирешергә була:
берничә бүлмәдәге электр лампочкалары белән импульслы реле ярдәмендә идарә итү. Бу утларны ерактан кабызу һәм сүндерү мөмкинлеге бирә;
кулланып бетергәч, электр көнкүреш җиһазларын шунда ук электр челтәреннән аерыгыз, ягъни сүндерегез;
яктылык таралышы көйләнелә торган галоген лампочкалар куллану энергияне 30 процентка кадәр экономияли;
гадәти аергыч (выключатель) урынына яктылык көйләгеч урнаштырыгыз. Әлеге җайланма яктылык таратуны көчәйтә йә киметә;
люминесцент лампалар электр энергиясен дүрт мәртәбәгә экономияли. Энергиягә сакчыл заманча лампалар 10 мең сәгать эшләргә сәләтле, ә кызып эшли торган лампаларның «гомере» уртача – 1,5 мең сәгать, ягъни алты-җиде мәртәбәгә азрак. Кечкенә генә 11Вт люминесцент лампа кызып эшли торган 60Вт лампа куәтенә тәңгәл. Алар өч-дүрт ел дәвамында эшли, бәясе бер ел эчендә аклана;
көн яктылыгына да битараф карамаска кирәк. Ачык челтәрләр, ак обой һәм түшәм, чиста тәрәзәләр, тәрәзә төбендәге чама белән куелган гөлләр фатирдагы яки өйдәге яктылыкны күбәйтә һәм электр яктырткычлар кабызу вакытын кичектерә;
энергиягә сакчыл лампалар кызып эшли торган лампаларга караганда ун мәртәбәгә озаграк хезмәт итә, ә электр энергиясенә 80 процентка кадәр экономия ясый.