Марат Әхмәтов: "Рухи бушлыкны татар телле контент белән тутырырга тиешбез"

2022 елның апрелендә татар телен саклау һәм үстерүгә юнәлтелгән проектларны яклау узды. Финалга 13 проект үтте һәм барысы да матди ярдәм алды. Финанслауның гомуми суммасы 6 миллион 534 мең сум тәшкил итте.

Сөйләшү барышында һәр проектның нинди этапта булуы тикшерелде. Яшьләр эшләре министры Тимур Сөләйманов, “яхшы полицейский” кебек, катнашучыларның һәр проектын яклап, аңлатып торды. Ә Марат Әхмәтов исә, яңа буынны сораулар биреп сынады. Алар, чыннан да, бик урынлы иде. Татар теле “сай” булган кешеләр проектны куллана алачакмы соң? Җаваплар уңай булса да, сорау катнашучыларга үз продуктларын камилләштерергә кирәклеген аңларга булышты.
– Минем ихтыяҗ проектларны тәкъдим иткән яшь төркемнәрнең фикерләве белән килешеп бетмәскә мөмкин. Катнашучылар үз яшендәге кешеләрнең күңелләренә үтеп керердәй ысуллар кулланылган проектлар күрсәтте. Мин аларны хуплыйм, көткәннән күпкә нәтиҗәлерәк, көчлерәк эш тәкъдим иттеләр. Очрашу белән канәгать калдым. Рухи бушлыкны татар телле чаралар, контент белән тутырырга тиешбез, – диде Марат Әхмәтов.

Катнашучылар проектлары белән Америка ачмадылар. Алар моңа кадәр оештырылган бәйгеләрне хәтерләтә. Мәсәлән, “Мин булдырам” проекты “Минута славы” тапшыруына, танышу өчен “Таптым” кушымтасы “Баду”, “Тиндер”га охшаш. Әмма аермалары да шактый.
– Һәр проект татар яшьләре форумы аша уза, шуңа күрә мин алар белән таныш. “Таптым” кушымтасының яшь чикләүләре юк. Беренче биттә кешенең фотолары урнаштырыла. Син ошый яки ошамый билгеләренә басасың. Анда кешенең яше, нинди шәһәрдән булуы күренеп тора. “Тиндер”ны төрле милләт вәкилләре, аудитория куллана. Ә бу проект татар кешесен эзләү өчен корылган. Танышу кушымтасын үзем кулланыр өчен ясыйм да инде, –  дип шаяртты Бөтендөнья татар яшьләре форумы рәисе Ленария Мөслимова.  

Ялгызлар игътибарына: танышу өчен кушымтаны 2023 елның гыйнвар-май айларында тәкъдим итәргә планлаштыралар. Озак көтәсе калмады...

Бәйгедә үз аудиториясен тапкан проектлар да катнашты. Мисал өчен, “Татар кызы”, “Яз гүзәле” конкурслары. Аларга бу өстәмә финанс ярдәм алып, проектны икенче баскычка күтәрү мөмкинлеген бирде.

“Әйдә ШаяРТ” Татар лигасы оештыручылары да яңа проект тәкъдим итте. “Шалт, Мөхәммәтҗан!” тапшыруы хәзерге заманда популяр стендап, миниатюра, импровизацияне берләштерә. Һәр чыгарылышта иң яхшы комик билгеләнә һәм ул 10 мең белән бүләкләнә. Проектның яшь чикләве - 18+.
– Элек ТНТ каналында “Убойная лига” дигән проект бар иде. Анда юморның бар юнәлеше кулланылган. Безнең проектта да төрле юмор юнәлешендә сәхнәдә чыгыш ясыйлар. “Шалт, Мөхәммәтҗан!”  ТМТВ каналында күрсәтеләчәк. Бу “Әйдә ШаяРТ”ның икенче җимеше. Татар юморы хәзер 5 нче сыйныфка гына китте. Үсәргә урын җитәрлек, – диде “Әйдә ШаяРТ” һәм “Шалт, Мөхәммәтҗан!” проектларының продюссеры Рамил Әгъдиев. 

Шулай ук, татарча квест, фестиваль, җыен һәм башка кызыклы проектлар үз эшчәнлеген башлап җибәрде. Татар кушымталарына килгәндә, мәсәлән, татарча навигатор, татар телле белгечләрне эзләп табарга ярдәм итүче “ESHLIM.TATAR” сервисы, “Таптым” танышу кушымтасы әзерлек этабын уза. Шунысы хак, бар проектлар да кирәкле. Киләчәктә тырышлыкның нәтиҗәсе күренер дип өметләнеп калабыз.

Илгизә Галиуллина