Мартта тамчылый, апрельдә агызып җибәрмәгәе

Шәһәр башкарма комитетының гражданнарны яклау идарәсе җитәкчесе Фердинант Тимурханов “эшлекле дүшәмбе” киңәшмәсендә әйткәнчә, март аеның мондый үзгәрүчән холкы язгы чорда файдага гына икән.
Казанда кар катламы 68 санитметрны тәшкил итә, җирдәге туң 25-42 сантиметр. Бистәләрдән Юдинода туң катламы - 42, Мирныйда - 40, Коры елгада 35 сантиметр. Җылылык белән салкынлык чиратлашып барса, язгы су ташкыннары чоры имин узып китәчәк.

- Әгәр һава кискен җылыта башласа, Казансу, Киндери, Вертлевка, Нокса һәм Коры елга буйларына урнашкан торак йортларны су басарга мөмкин, - дип кисәтте Фердинант Тимурханов.
Казанда шушы бистәләргә язгы су басу куркынычы яный: Коры елга, Колсәет, Киндери, Савиново, Яңа Сосновка, Ягодная Слобода, Әке, Царицыно, Кече Клыки, Вознисенское, Салмачи, Борисково, Мирный. Шулай ук Семиозерск, Дружба, Красная Горка, Левченко, 1нче Май, Әмәт һәм Константиновка.

Су басулар башланса, ашыгыч чаралар күрү өчен 150 бригада оештырылган. Алар карамагында 137 берәмлек техника, 147 су суырткыч. Су баскан урыннардан вакытлыча күчереп тору өчен 12 пункт (гомүми исәптә 2910 кешегә) билгеләнгән. Кар сулары агып китсен өчен әле узган көздә үк гомүм исәптә 3 километр ерганак төзекләндерелгән.

Казан урамнарыннан кыш башыннан 700 мең тонна кар чыгарылган, бу эш дәвам итә.
- Җир асты юл кичүләрендәге су сырткычларның төзеклеге тикшерелә, су юллары чистартыла. Казанда ун ел элек метроның кайбер станцияләренә су керү куркынычы бар иде. Моңа каршы чаралар күрелде. Хәзер метро станцияләре һәм гидротехник корылмалар язгы су басуларга каршы чараларга әзерлекле, су басу янамый, - дип ышандырды Фердинант Тимурханов.

Язгы чорда боз өстенә балык тотарга кермәвең хәерле, суга бату ихтималы зур. Балыкчыларны инде 18 февральдән үк кисәтү башланган.
Фердинант Тимурханов бистәләрдә яшәүчеләрне шәхси йортлары тирәсендәге карларны читкә алып ташларга, ерганаклар ясарга чакырды.  

Мэр Илсур Метшин “быел кар күп” дип, шәһәр предприятиеләрен һәм оешмаларын язгы су ташкыннарына каршы чаралар күрергә кушты.
Куен дәфтәренә: коткару хезмәтенең бердәм телефоны - 112.