Маска - мода артыннан куып киясе аксессуар түгел...

Татарстанда узган тәүлек эчендә 4904 тест үткәрелде

Республикада пандемия вакытында коронавирусны ачыклаучы тестларның гомуми күләме 280 мең тирәсе тәшкил иткән. 

“Татар-информ” мәгълүмат агентлыгында узган матбугат конференциясендә ТР буенча Роспотребнадзор идарәсе җитәкчесе урынбасары Любовь Авдонина хәбәр иткәнчә, үз теләге белән түләүле нигездә COVID-19 га антитәнчекләргә анализ бирергә теләүчеләр саны арта.

Санитар табиблар янә эшли башлаган җәйге верандаларны да тикшергәннәр. Санитар кагыйдәләр бозу арасында антисептикларның, маскаларның булмавы, җитмәсә, бер тапкыр гына киелә торган маскаларны кию буенча да җитешсезлекләр бар икән. Беренчедән, мондый битлекчәләрне һәр ике сәгать алыштырасы, икенчедән, аны тиешле дәрәҗәдә борынга үк күтәреп киясе.
- Шуңа игьтибар итик, ул мода артыннан куып киясе аксессуар түгел, ияк астына төшереп киюдән ни мәгьнә? - дип ачына Любовь Авдонина. Мондый очракларда да санитар табиблар хокук бозу турында тиешле күрсәтмә язалар икән.   

- Санитар-эпидемиологик вәзгыять тотрыклы булмаган төбәкләрдән, чит илләрдән кайткан җитмеш бер кеше обсерваторларда кала бирә, аларның биредә тору вакыты 1 июльдә тәмамлана, - дип билгеләп үтте санитар табиб, - 1325 кеше шул ук вакытта безнең күзәтү астында, алар коронавирус йоктыручылар белән тыгыз элемтәдә булганнар. Узган тәүлек эчендә аэпортларда 35 һава судносы һәм 395 пассажир тикшерелде. Россия төбәкләре арасында коронавирус буенча Татарстан 79 урында. 

Бүгенге көннән 9 санаторий яңа санитар таләпләр буенча үз эшләрен башлап җибәрә. Бирегә инде ял итүчеләр килеп урнашкан. 

- Шуны ассызыклыйк, кайбер урыннарда нәкь менә авырулар саны оешмаларда ачыклана, эшчеләр өйләренә кайткач, чирне туганнарына йоктыра, - ди  Любовь Авдонина.

Лилия Гайнуллина