Мәчкәрә имамы Мөнир хәзрәт: “Режиссер, уйнаш булган кадрны башка җирдә төшерәбез, дип әйтте”

Кичә күптән көтеп алынган “Зөләйха күзләрен ача” фильмы күрсәтелә башлады. Бүген социаль челтәрләрдә аның турында шактый бәхәсле комментарийлар да барлыкка килде. Халыкны бигрәк тә мәчеттә төшерелгән кадрлар борчыды.

Кукмара районындагы Мәчкәрә авылының борынгы мәчете күрсәтелә анда. Тамашачылар ир белән хатын арасындагы интим кадрлар да шул мәчеттә төшерелдеме икән дип борчыла. Әлеге сорау белән без авыл имамы Мөнир хәзрәт Йосыповка шалтыраттык.

Хәзрәт әйтүенчә, китапны ул укымаган. Авылларында фильм төшерелә башлагач та, кемдер аңа телефоннан шалтыратып, шундый күренешләр дә булырга мөмкин анда, дип кисәткән. Мөнир хәзрәт режиссер янына барып сөйләшкән. Без бу кадрны башка җирдә төшерәбез дә, монтажлап кертәбез, дигән анысы.