Шәһри Казан

Мәләкәс фаҗигасендә гаепләнүче Тимурның әтисе: "Үз куллары белән тавык та суя алмый иде ул!"

Радик Прохоров: «Кемнәрдер, улымны үтереп, машинага утыртып калдырган булырга тиеш. Шуларны табарга кирәк. Мондагы тикшерүчеләр генә очына чыга алмаса, Мәскәүгә мөрәжәгать итәчәкмен», – ди.

Атна башында Чаллы янында урнашкан Мәләкәс авылындагы канлы вакыйга бөтен республика халкын тетрәндерде. 25 яшьлек Тимур Прохоров 21 яшьлек хатыны һәм аның туганын пычак белән кадап үтерә. Соңыннан, тикшерүчеләр фикеренчә, егет үзе дә әтисенең ау мылтыгы белән атылып үлә. Керәшен, татар, рус милләте вәкилләре дус-тату яшәгән авылда моңа ышанмыйлар.

Өч көн элек кенә никахларын рәсмиләштерүне бәйрәм иткән гаиләдә мондый хәлнең булуы мөмкин түгел, диләр. Авыл җитәкчеләре дә, күрше-күлән дә бу ипле пар бер-берсен бик ярата иде, дип кабатлыйлар. Тимурның мондый вәхшилеккә кулы бармас иде, дип, мәрхумнең туганнарына дөреслекне торгызырга киңәш итәләр.

Тимурның әтисе Радик Прохоровның авылдашларының, хезмәттәшләренең, кайгы килгәч, ярдәм итүләренә, иңнәрен куюларына куңеле булган. Нинди олы йөрәкле икән Мәләкәс халкы! Тимур ике балалы гаиләдә төпчеге була. Әниләре, каты авырып, иртә дөнья куйган.

- Ул кайгыны улларым белән бергә күтәрдек, алар әниләрен карарга да булыштылар. Бергә өй җиткердек. Тимур өйләнеп, шунда яши башлагач, күңелем тыныч булды, – дип сөйли әти кеше. – Мин баламның андый җинаятькә барырына ышанмыйм. Ышанасызмы, үз куллары белән тавык та суя алмый иде ул! Алсуны да бик яратты. Бөерләре авыру булса да йөз чөермәде ул аннан. Кадерләп яшим, дип, тәкъдим ясады. Без бер бригадада эшләдек. Алсуның башы авыртса да, эштән сорап, кайтып китә иде.

Реклама

«Авылдашлар да, хезмәттәшләр дә Тимурны мактыйлар иде», – ди Радик Прохоров. Ул аларга, балаларын җирләгәндә күрсәткән ярдәмнәре өчен, рәхмәт белдерә. Кешеләрнең ышанычы дөреслекне әзләргә этәрә. Яшьләрне әрәм иткән чын җинаятьчеләр табылырга тиеш, дип саный.

Әлегә тикшеру бара. Тик матбугатта, Тимур Прохоровны җинаятьче итеп билгеләгән беренче фаразларда, шик уяткан кайбер фактлар чыкты инде: үләр алдыннан егет үзе дә каты кыйналган булган. Ул табылган машинада кан таплары да булмаган. Радик Прохоров: «Кемнәрдер, улымны үтереп, машинага утыртып калдырган булырга тиеш. Шуларны табарга кирәк. Мондагы тикшерүчеләр генә очына чыга алмаса, Мәскәүгә мөрәжәгать итәчәкмен», – ди.

Чыганак: Шәһри Чаллы

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: