"Нефтехимик" шәкерте Эмиль Галимов "Ак Барс"ка җиңү китерде

Гагарин Кубогы өчен көрәштә "Ак Барс" белән "Нефтехимик" өченче уенын уздырды. Казанлылар, овертаймда алка кертеп, сериядәге исәпне үз файдасына 3:0гә җиткерде.

Беренче булып исәпне казанлылар ачты. Бары тик өченче периодта гына бәхет Эмиль Галимовка елмайды. Әмма период тәмамланырга өч минут вакыт калып барганда, мәйдан хуҗалары исәпне тигезли алды. Әлеге алканы казанлылар капкасына Илдар Шиксатдаров кертте.

Овертайм чагыштырмача озакка - 10 минутка кадәр дәвам итте. Өстәмә вакытта бәхет "Ак Барс"ка елмайды. Казан командасына җиңү китергән алканы шул ук Эмиль Галимов кертте, дип хәбәр җибәрде Түбән Камадан "Шәһри Казан" хәбәрчесе Фәнис Мотыйгуллин.

Сүз уңаеннан, Эмиль Галимов - "Нефтехимик" шәкерте. Журналистларга биргән әңгәмәсендә ул боз сараенда үзенең күпсанлы туганнары, танышлары булуын искәртте.

Алдагы очрашу янә Түбән Камада 8 мартта узачак.

Фото: www.ak-bars.ru