#Язмалар 12 мая 2021, 09:30

"Парта астында утырганда, улым миңа хушлашу сүзләре язган"

12 мая 2021, 09:30

Танылган алып баручы Гөлназ Миньязованың ике баласы да фаҗига булган 175нче мәктәптә укый. Атыш башланган вакытта Гөлназның улы Сәет мәктәптә булган. Сәет 9нчы сыйныфта белем ала, аларның сыйныфы атыш булган 8нче сыйныф янәшәсендә булган.

Скопировать ссылку

"Парта астында утырганда, улым миңа хушлашу сүзләре язган"

“Улым бүген бик зур шок кичерде. Әйе, балаларым 175нче гимназиядә укый. Махсус аларны шунда урнаштырдым, чөнки анда көчле укытучылар белем бирә, бик яхшы мәктәп.

11 май иртәсе коточкыч хәбәрдән башланды. Икенче сменада укучы кызым әле өйдә иде, мәктәбебезгә террористлар кергән, дип хәбәр итте. Ул вакытта террористның берәү генә булуын белми идек әле.

Мин телефонга ябырылдым. Төркемнәрдә ата-аналар елый, инде полиция белән коткаручылар да килгән.
Менә шунда миңа шок булды. Ышанасым килмәде. Безнең психика шулай корылган: әгәр зур шок кичерү куркынычы булса, ул теләсә нинди мәгълүматны блокка куя. Башымда томан. Сәетнең әтисе (Илнур Фәйзрахманов-ред.) җибәргән смс-хәбәрләрен тыңлыйм. Ниһаять, ул улыбызны мәктәптән алуын әйтте.
Улымны беркайчан да болай озак көткәнем юк иде әле. Бу минутлар сәгатьләр кебек тоелды. Аны исән килеш күргәч, кочаклаштык. Соңрак белдем: парта астында утырганда, улым миңа хушлашу сүзләре язган. Еладым.

Әле һаман ышанмыйм. Мин үземне бик яхшы сизәм. Мондый стрессны беренче тапкыр кичерүем. Кич белән чын-чынлап бушандым, еладым.
Мин баламны югалта язуымны аңладым һәм күрдем. Үзәк өзгеч җан сызлавын кичердем һәм моның аша уздым. Һәлак булган балалар белән хушлаштым.
Балаларын югалткан ата-аналарның хәлен аңлатып бетергесез.
Урыннары җәннәттә булсын.
Бу хәлләрне кичерергә һәм яшәргә көч, сабырлык телим”, - дип язган Гөлназ Миньязова.