Һәр бишенче авариядә исерек гаепле 

Министрлар Кабинетында узган юл хәрәкәте  куркынычсызлыгын тәэмин итү буенча утырышта белем көненә әзерлек,юл һәлакәтләрен,  исерек машина йөртүчеләрне киметү һәм башка кисәтү чаралары турында сөйләштеләр.

Татарстанның баш дәүләт автоинспекторы Ленар Габдрахманов әйтүенчә, республикада һәр бишенче юл һәлакәте исерек машина йөртүчеләр аркасында килеп чыга. Узган ялларда гына спиртлы эчемлек кулланган шоферлар дүрт юл һәлакәтенә сәбәпче булган. Бигрәк тә Аксубай, Әлмәт, Зәй, Тукай, Теләче районнарында мондый төр аварияләр еш күзәтелә. Исерек килеш машина йөртүчеләр катнашында  быелның җиде аенда барлыгы 195 юл һәлакәте теркәлгән. 29 кеше һәлак булган, 285е тән җәрәхәтләре алган.

Кызганыч, авариядә зыян күрүчеләр арасында балалар да бар. Быел биш бала һәлак булган. Алар барысы да пассажир. Статистика күрсәткәнчә, уку елы башлану белән урамнарда транспорт хәрәкәте көчәя, балалар, үсмерләр  катнашындагы аварияләр саны да арта.  Шуңа да Шамил Гафаров сентябрь башында юлларда аеруча игътибарлы булырга кушты. Бу уңайдан сентябрьдә республикада «Игътибар, балалар» дип исемләнгән рейд башланачак. Инспекторлар юлларга гадәттәгедән күбрәк  чыгар дип көтелә.

Мәктәп автобусларын рәткә китерү буенча җитешсезлекләр булган районнарга шелтә белдерелде. Тикшерү барышында кайбер районнарда мәктәп автобусларының төзек булмавы, техник таләпләргә җавап бирмәве ачыкланган. Аварияләр еш очрый торган куркыныч булып саналган юл кишәрлекләрен төзекләндерүгә дә басым ясалды. «Куркынычсыз һәм сыйфатлы юллар» илкүләм проектын тиешенчә үтәмәүче районнарга кисәтү ясалды.  

Быелның җиде аенда республикада 2073 юл һәлакәте теркәлгән. 153 кеше һәлак булган. Аварияләрдә үлүчеләр аеруча Бөгелмә, Мөслим, Питрәч, Яшел Үзән районнарында күзәтелә. Юл һәлакәтләренә китергән төп сәбәпләр –  каршы яктан килгән  машина белән бәрелешү, җәяүлене таптау, әйләнеп каплану.  

Фото: https://xn--90adear.xn--p1ai/r/16