Равил Шәрәфиев: "Хатын-кыз булсам, бозылып беткән булыр идем"

Күренекле драматург Туфан Миңнуллинның легендар “Әлдермештән Әлмәндәр” әсәре буенча Камал театрында куелган спектакльдә Әҗәл ролен Россиянең һәм Татарстанның халык артисты Равил Шәрәфиев уйнады. Анимацион фильмда да бу рольне ул тавышландырган. Ә менә Әлмәндәр ролен Камал театры артисты Эмиль Талипов тавышландырган. Спектакльдә исә бу рольне мәрхүм Шәүкәт абый Биктимеров гаҗәеп итеп башкарган иде.

“Анимацион фильмда Әҗәлне тавышландырырга тәкъдим иткәч, бер елгага икенче тапкыр керү булмый микән, дип уйладым. Минем йомшак ягым бар – баш тарта белмим. Хатын-кыз булсам, бозылып беткән булыр идем (көлә). Шаярам, әлбәттә. Спектакльне мульфильмга күчерергә теләмиләдер дип уйладым. Иҗат кешеләре бит. Һәм ялгышмаганмын. Ул безнең спектакль түгел. Кабатлау юк. Бу фильмда кайбер фикерләр безнең спектакльгә караганда көчлерәк тә тоелды миңа. Мәсәлән, мин Әҗәлне уйнадым. Дөресен генә әйткәндә, мин Әлмәндәрне уйнарга теләгән идем. Әҗәл нәрсә ул? Кансыз бит ул. Аның нәрсәсен уйныйсың? Әлмәндәрнең тормыш яратуын күреп, Әҗәл дә аңа иярә, кешегә әйләнә, “кан” керә башлый. Ә фильмда ул “кан” күбрәк тә сыман. Шул ягы ошады”, - диде ул.

Равил абый фильмны тавышландырганда, үз фикерен әйтүен һәм хәтта кайбер урында сценарийны үзгәртүен дә әйтте. Ә спектакльдә мондый гамәл мөмкин түгел икән. “Дөньяда үлем генә түгел, яшәү бар, кешенең рухы бар. Фильмда рухның көчлелеге күренә”, - диде ул.