Рината Тейның автомобиль һәлакәтенә очраган ире аңына килгән

Танылып килүче җырчы Рината Тейның тормыш иптәше Сәгыйрь октябрь аенда автоһәлакәткә очрап, комада ятуы хакында хәбәр иткән идек.

Ниһаять, ул аңына килгән. Рината көне - төне ире янында булуы, шул ук вакытта, улын һәм иҗатын онытмавы хакында социаль челтәрдәге сәхифәсендә яза. 

"Сәгыйрь аңына килде, күзләрен ачты, ишетә, таный кебек, без әйткән кайбер командаларны да үти. Көн саен шөгыльләнәбез, акрынлап утырта башладык. Әлегә зонт аша туклана, әмма суны авызына салырга тырышабыз. Аның өчен бу җиңел түгел, тик ул бик нык тырыша", - ди Рината ире хакында. 

Җырчы рухи яктан үзенә бик авыр булуын, әмма ирен элеккеге хәлатенә кайтару өмет барлыгы хакында да язган. 
"Алда безне озак реабилитация көтә. Безгә бирелгән авырлыкларны уза алачагыбызга ышанам", - ди Рината.

Лилия Локманова

Фото Рината Тейның социаль челтәрдәге шәхси сәхифәсеннән алынды