Рөстәм Миңнеханов: “Шаярырга ярамый!”

Президент Татарстанда 15 апрельгә кадәр кертелгән махсус санитар-эпидемиологик режимның барлык таләпләрен үтәү бурычын катгый куйды.

– Республикада әлегә бернинди куркыныч юк. Бу - саклану. Моның өчен без барысын да эшлибез. Без бу мәсьәләләрне контрольдә тотуыбызны төгәл аңларга тиеш. Керү-чыгу юлларын тикшермәсәк, катлаулы хәлдә калуыбыз бар, – диде Рөстәм Миңнеханов.

Президент, аерым алганда, мәгариф министры Рафис Борһановка мөрәҗәгать итеп, каникуллар чорында балаларны чит илгә җибәрүләрне тыю бурычын йөкләде.

“Әти-әниләр белән дә, өлкәннәрдән башка да оештырылган төркемнәрне каядыр җибәрү тыела. Вокзаллар, туклану нокталары бар. Әгәр дә мондый очраклар булса, ике атналык карантинга. Бу бары тик балалар мәнфәгате өчен эшләнелә. Беркем дә уйлап тапмады, бөтен дөнья бу системаны куллана, – ди ул муниципалитет башлыкларына һәм мәктәп директорларына мөрәҗәгать итеп. – Барысы да аңларга тиеш, монда шаярулар була алмый”. 

Президент шулай ук республикада төрле спорт чараларын үткәргәндә дә саклык чараларын кулланачакларын белдерде. “КХЛ буенча да хәл иттек. Тамашачыларсыз уйнаячакбыз. Болар бары тик гражданнар мәнфәгатьләрендә эшләнә. Бәлки бик уңайсызлык та тудырыр. Кемнеңдер яраткан командасы, яраткан спортчысы булырга мөмкин. Тик кешеләрнең сәламәтлеге мөһим. Син үзеңне генә түгел, гаиләңне, әйләнә-тирәңне дә куркыныч астына куясың. Балаларга аерым игътибар итәргә. Балалар ахырына кадәр барысын да аңламый. Без саклык чаралары күрергә тиеш”, – диде ул.

Бу темага тагын укырга: Спорт ярышлары, концертлар, командировкалар... - барысына да чикләүләр кертелде