Рөстәм Миңнеханов Советлар Союзы Героена бюст ачу тантанасында булды

Тантаналы ачылышта ТР Мәгариф һәм фән министры Илсур Һадиуллин, ТР Хезмәт, халыкны эш белән тәэмин итү һәм социаль яклау министры Эльмира Зарипова, ТР Мәдәният министры Ирада Әюпова, Казан мэры Илсур Метшин, Борис Кузнецовның тол хатыны Әлфия Филатова катнашты.

“Бүген - Бөек Җиңү көнендә без Советлар Союзы Герое Борис Кузнецовка бюст ачу тантанасына җыелдык. Борис Кириллович – Бөек Ватан сугышы герое, Ватанга фидакарь хезмәт иткәне өчен югары дәүләт мактау билгесенә лаек булды. Аның Ватанга мәхәббәте, сугышларда һәм хезмәттә батырлыгы - яшь кешеләр өчен лаеклы һәм илһамландыручы үрнәк. Ә республикабыз яшьләрен патриотик, әхлакый һәм рухи яктан тәрбияләүгә юнәлтелгән иҗтимагый эшчәнлеге аерым сүзләргә лаек. Борис Кириллович турындагы якты истәлек, аның бетмәс-төкәнмәс энергиясе, оптимизмы, патриотизм зирәклеге мәңгегә безнең йөрәкләрдә калачак”, - диде Рөстәм Миңнеханов.

Рөстәм Миңнеханов Борис Кузнецов белән шәхсән таныш булуын да әйтте. "Ул көчле энергияле, уникаль кеше иде", - диде ул.

“Бүген иң яхшы уку йортларының берсендә - аның исемен йөрткән кадет мәктәбендә бөек шәхескә бюст ачабыз һәм барлык ветераннарыбызны искә алабыз. Бүген илебез Украинада махсус хәрби операция үткәргәндә, Бөек Ватан сугышы геройлары рухы, аларның максатчанлыгы һәм Ватанга хезмәт итүе - Бөек Ватан сугышында катнашкан кешеләрнең оныклары һәм оныкчыклары өчен үрнәк ул. Без аларны һәрвакыт истә тотачакбыз”, - диде Рөстәм Миңнеханов.

Борис Кузнецовның тол хатыны Әлфия Филатова сүзләренчә, Борис Кузнецов кадет мәктәбенең аның исемен йөртүе белән һәрвакыт горурланган. “Ул матур тормыш кичерде”, - диде Әлфия Филатова. Ул илдә тынычлык, иминлек булсын, дип теләде.

Казанның кадет мәктәп-интернаты укучылары Советлар Союзы Герое Борис Кузнецовка багышланган шигырьләр укыды, шулай ук кадетлар оркестрының чыгышы да булды. Соңыннан Рөстәм Миңнеханов Казанның кадет мәктәп-интернаты директоры Рәис Юнысов белән бергә бинаны һәм уку классларын карады.

Фото: kzn.ru