Салымыңны түләсәң, йокың татлы, күңелең тыныч булыр

Милек өчен салым түләү тәртипләре турында Министрлар Кабинетында узган брифингта Федераль салым хезмәтенең Татарстан буенча идарәсе җитәкчесе Марат Сафиуллин сөйләде.

Татарстанда салым түләргә тиешле 2 миллион 200 мең кеше исәпләнә. Аларга инде октябрь аенда ук электрон формада, почта аша салым түләү турында белдерү кәгазьләре җибәрелде. Быел салым турында кисәтү яңа формада башкарыла. Конвертта бу юлы берничә квитанция урынына бер документны гына күрер­гә була. Анда салымны бюджет системасына күчерү өчен кирәкле реквизитлар күрсәтелгән.
Иң күп салым транспорттан җыела икән. Халык арасында салымнан акча кайтару да популяр. Быелның 10 аенда салымнан барлыгы 9,1 миллиард сум акча кайтарылган.

Нәрсә өчен түләргә?

Бүлмәсе, фатиры, йорты, төзелеп бетмәгән торагы, гаражы, теркәлгән машина кую урыны, җир кишәрлеге, транспорты булган кешеләргә салым түләргә кирәк. Әгәр дә салым түләү турында белдерү килмәгән икән, кеше милеге турында салым инспекциясенә үзе хәбәр итәргә тиеш.

Ничек түләргә?

Салымны банклар, терминаллар, почта бүлекләре, «Налоги ФЛ» мобиль кушымтасы, дәүләт хезмәтләренең федераль һәм региональ порталлары, «Электронное правительство Республики Татарстан» терминалы аша түләргә була. Шулай ук федераль салым хезмәте сайтында теркәлгән шәхси кабинет аша да түләүләр кабул ителә. Элек һәркем үзе өчен салымны үзе түләргә тиеш иде. Хәзер бу канунга үзгәрешләр кертелде, хатын өчен – ире, ир өчен хатыны да түли ала.

Нинди ташламалар каралган?

Өч һәм аннан да күбрәк баласы булганнарга балигъ булмаган һәр бала исәбеннән фатирда – 5 квадрат метр исәбеннән, шәхси йортта 7 квадрат метр исәбеннән салым чигерүе каралган. Җир салымы буенча күп балалы гаиләләр өчен кишәрлекнең 600 квадрат метрына салым киметелә.
Пенсиягә чыгу алды яшендәгеләргә милекнең бер төренә: торакка, гаражга, фатирга салым түләүдә ташламалар каралган. Шулай ук җир кишәрлегенең 600 квад­рат метрына салым киметелә.

Зөлфия Халиуллина фотосы

Салымны вакытында түләмәсәң:

– Россия Салым кодексының 75нче маддәсе нигезендә, түләнмәгән салым өчен өстәмә түләү каралган. Салым түләү вакыты узганнан соң, кимендә биш көн эчендә салым органнарыннан кисәтү килә. Ул очракта да салым түләнмәсә, бурычны суд аша кайтарачаклар. Суд приставлары кешенең милкен, банктагы исәп счетларын, керемен барлаячак. Бурычлы кешене чит илгә чыгу хокукыннан да чикләргә мөмкиннәр. Моннан тыш, бурычның 7 проценты күләмендә, әмма 1000 сумнан да ким булмаган җыелма сумманы түләргә туры киләчәк. Әгәр дә бурыч суммасы 25 мең сумнан артмый икән, салым инспекциясенең ул акчаны кешенең хезмәт хакыннан, пенсиясеннән, стипендиясеннән тотып калырга да хакы бар.